სახელმწიფო უსაფრთხოების სამსახურში არ პასუხობენ On.ge-ს კითხვას 22 ნოემბერს თბილისში ჩატარებული სპეცოპერაციის დროს ლიკვიდირებულია თუ არა აჰმედ ჩატარევი. უწყებაში აღნიშნავენ, რომ სპეცოპერაციასთან დაკავშირებით ინფორმაციას თავად გაავრცელებენ.

თურქული პრო-სახელისუფლებო მედიასაშუალება Daily Sabah ინფორმაციას ავრცელებს, რომლის მიხედვითაც, თბილისში, 21-22 ნოემბრის სპეცოპერაციის შედეგად მოკლულია ტერორისტული ორგანიზაცია ისლამური სახელმწიფოს მებრძოლი აჰმედ ჩატაევი. Daily Sabah ეყრდნობა სხვა თურქულ გამოცემა Haberturk-ს. Haberturk ვარაუდობს, რომ მოკლულებს შორის აჰმედ ჩატაევია, თუმცა არ ასახელებს, საიდან აქვს აღნიშნული ინფორმაცია.

21-22 ნოემბრის სპეცოპერაციის შედეგად, დაიღუპა ერთი სპეცრაზმელი და დაჭრილია ოთხი სამართალდამცავი. სახელმწიფო უსაფრთხოების სამსახურის ცნობით, ლიკვიდირებულია დანაშაულებრივი ჯგუფის სამი წევრი.

სპეცოპერაციის გამო მიმდებარე ტერიტორიიდან ევაკუირებული იყო მოსახლეობა, სკოლასა და სამ ბაღში კი სასწავლო პროცესი შეწყდა. სპეცოპერაციის შესახებ არაერთი მნიშვნელოვანი დეტალი და გარემოება ამ დრომდე უცნობია.