ბათუმში, ყოფილი მანქანათმშენებელი ქარხნის ტერიტორიაზე საფეხბურთო სტადიონს, სავარაუდოდ კომპანია ანაგი ააშენებს. სტადიონის ასაშენებლად წინადადებების მიღება დასრულებულია, გამარჯვებული კი რამდენიმე დღეში დასახელდება.

მშენებლობის ბიუჯეტი 101,7 მილიონი ლარი იყო, კომპანია ანაგმა კი ფასი 99 448 549 ლარის შეთავაზება გააკეთა.

ტენდერი აჭარის ავტონომიური რესპუბლიკის კუთვნილმა კომპანიამ, შპს სტადიონმა 19 ოქტომბერს გამოაცხადა. დოკუმენტაციის მიხედვით, სტადიონი 20 000 მაყურებელზეა გათვლილი. ხოლო სამუშაოს შესრულების სავალდებულო ვადა ხელშეკრულების გაფორმებიდან ორი წელი და 10 თვეა.

ბათუმის სტადიონის აშენებამდე, უეფა-ს მეოთხე კატეგორიის სტადიონი საქართველოში მხოლოდ ერთია - ბორის პაიჭაძის სახელობის დინამო არენა. უეფა-ზე პირველი და მეორე ტურის მოგების და პლეიოფში გასვლის შემთხვევაში, გუნდს შეუძლია მესამე კატეგორიის სტადიონზე ითამაშოს. ხოლო მეოთხე კატეგორიის სტადიონზე ჩემპიონთა ლიგის ჯგუფური ეტაპის მატჩები და ყველა სანაკრებო თამაშის ჩატარებაა შესაძლებელი. აღსანიშნავია, რომ ქართულ გუნდებს პირველი ტურის გადალახვაც უჭირთ.

შესწორება: მასალის თავდაპირველ ვერსიაში მითითებული იყო, რომ ანაგი ერთადერთი კომპანია იყო, რომელიც ტენდერში მონაწილეობდა.