საქართველოს პროკურატურის თანამშრომლებმა 2012 წლის ოქტომბრამდე პატიმართა მიმართ დამამცირებელი და არაადამიანური მოპყრობის ბრალდებით გლდანისა და რუსთავის ციხეების ხუთი ყოფილი თანამშრომელი დააკავეს. როგორც პროკურატურაში გამართულ ბრიფინგზე გახდა ცნობილი ბრალდებულები სასამართლოს განჩინების საფუძველზე არიან დაკავებულები.

"დადგინდა, რომ ბრალდებულები დაწესებულებაში შესახლებისას, პატიმრებს განურჩევლად უსწორდებოდნენ ძალადობრივი მეთოდებით, აყენებდნენ მათ სიტყვიერ და ფიზიკურ შეურაცხყოფას, ხოლო შემდგომ პერიოდშიც ამავე პატიმართა მიმართ ძალადობას ჰქონდა სისტემატიური ხასიათი, რისი მიზანიც იყო მათი უსიტყვო მორჩილება", - აცხადებენ პროკურატურაში.

მათივე ინფორმაციით, ბრალდებულთა ქმედებების შედეგად პატიმრებს უკანონოდ შეზღუდული ჰქონდათ გასეირნების, სატელეფონო საუბრებისა და მიმოწერის უფლება. არ ჰქონდათ სამედიცინო მომსახურებით სარგებლობის შესაძლებლობა, მათ ასევე შეზღუდული ჰქონდათ ძილისთვის და დასვენებისთვის განკუთვნილი დრო.

პროკურატურის ინფორმაციით, ბრალდებულები პატიმრებს ართმევდნენ კანონით მინიჭებული პირადი ჰიგიენის ნივთებს, საწოლისთვის განკუთვნილ თეთრეულს, იძულებით აშიშვლებდნენ და მათი ნების საწინააღმდეგოდ შიშველ მდგომარეობაში ამწყვდევდნენ კარცერში, სადაც დაბალი ტემპერატურის მიუხედავად, გაუსაძლის მდგომარეობაში ამყოფებდნენ მრავალი დღის განმავლობაში.

უწყება საქმის გამოძიებას სისხლის სამართლის კოდექსის 1443-ე მუხლის მე-2 ნაწილის "ა", "ბ", "დ", "ე", "ზ" ქვეპუნქტებით. ამ მუხლებით, სისხლისსამართლებრივი პასუხისმგებლობა მოხელის მიერ სამსახურებრივი მდგომარეობის გამოყენებით თავისუფლებაშეზღუდული პირის მიმართ დამცირებისთვის, არაადამიანური მოპყრობისთვის, პატივისა და ღირსების შემლახავ მდგომარეობაში ჩაყენებისთვის დგება.

პროკურატურაში ამბობენ, რომ პატიმართა მიმართ არასათანადო მოპყრობის ფაქტების გამოძიების შედეგად, სისხლისამართლებრივი დევნა დაწყებულია პენიტენციური სისტემის 72 თანამშრომლის მიმართ, მათ შორის სასჯელაღსრულების დაწესებულების 8 დირექტორისა და 7 დირექტორის მოადგილის მიმართ.