შინაგან საქმეთა სამინისტრო უარყოფს მედიაში გავრცელებულ ინფორმაციას იმის შესახებ, რომ პოლიციის თანამშრომლებმა ლანჩხუთის რაიონის აცანეს ეკლესიის წინამძღვარი სცემეს. პრესსამსახურის ინფორმაციით, 26 ივნისს, დილით, აღნიშნული პირი პატრულმა იმიტომ გააჩერა რომ გადაჭარბებული სიჩქარით მოძრაობდა.

შსს-ს განცხადებით, სასულიერო პირი ნასვამ მდგომარეობაში იყო და პოლიციელებს წინააღმდეგობა გაუწია, რის შემდეგ იგი აღნიშნული მუხლით დააკავეს, თავიანთ მანქანაში ჩასვეს და ოზურგეთისკენ წაიყვანეს.

როგორც შსს-ს პრესსამსახურის წარმომადგენელი ჰყვება, დაკავებულმა პოლიციის მანქანაში თავად მიიყენა თვითდაზიანებები. მისივე თქმით, კამერებმა დააფიქსირეს ის თუ როგორ გაუწია მან წინააღმდეგობა პატრულს და ისიც, თუ როგორ მიიყენა თვითდაზიანებები მანქანაში. აღნიშნული კადრების გასაჯაროვებას შსს არ აპირებს ეთიკური ნორმებიდან გამომდინარე.

უწყებაში ასევე აცხადებენ, რომ აღნიშნული პირი ხელწერილის საფუძველზე გაათავისუფლეს, მოგვიანებით კი სასამართლო გადაწყვეტს მისი სასჯელის საკითხს.

რუსთავი 2-ის მიერ გავრცელებუყლი ინფორმაციით, ლანჩხუთის რაიონის აცანის ეკლესიის წინამძღვარს სამართალდამცველები გაუსწორდნენ.

კურიერთან საუბრისას მღვდელი ჰყვება, რომ ის ნასვამ მდგომარეობაში მართავდა ავტომობილს რა დროსაც ლანჩხუთში პოლიციამ გააჩერა. მისი თქმით მან ავტომობილი ქართული ოცნების ოფისთან გააჩერა და სამართალდამცველებს ბოდიში მოუხადა. სასულიერო პირის განცხადებით, პოლიციამ მას ხელბორკილები დაადო, მანქანაში ჩასვა და სცემა.