ტაბულას დირექტორი, თამარ ჩერგოლეიშვილი ამბობს, რომ მათ ოფისთან ერთი პირი მივიდა, რომელიც მათ თანამშრომლებს გადაწვით ემუქრებოდა. ამის შესახებ მან On.ge-ს განუცხადა.

მისი თქმით, ეს ქმედება სამი ტიპის დანაშაულის ნიშნებს შეიცავს: სიძულვილით მოტივირებული დანაშაული, ჟურნალისტური საქმიანობის ხელისშეშლა და ადამიანების უსაფრთხოებისთვის ხელის შეშლა.

"საფრთხე იყო რეალური. [ამ პირმა] პოლიციას დაუდასტურა, რომ გადაგვწვავს, მათი თანდასწრებით თქვა", - ამბობს ჩერგოლეიშვილი On.ge-სთან საუბრისას.

მისი თქმით, მისი მიზანი თანამშრომლების უსაფრთხოების დაცვაა და რა ფორმით იქნება ეს შესაძლებელი პოლიციის გადასაწყვეტია.

"პოლიციამ თავად უნდა გადაწყვიტოს რა იქნება ამისთვის საკმარისი გაფრთხილების მიცემა თუ დაკავება. ესაა მათი გადასაწყვეტი. ელაპარაკნენ და აპირებენ, რომ ხელწერილი დააწერინონ", - ამბობს ჩერგოლეიშვილი.

ჩერგოლეიშვილის მიერ ნახსენები პირის მისვლისა და მუქარის შესახებ ტაბულა ვიდეოსაც ავრცელებს.

საქმეზე შინაგან საქმეთა სამინისტრომ გამოძიება სისხლის სამართლის კოდექსის 151-ე მუხლის პირველი ნაწილით დაიწყო. ამ მუხლი, სიცოცხლის მოსპობის ან ჯანმრთელობის დაზიანების მუქარა, როდესაც იმას, ვისაც ემუქრებიან, გაუჩნდა მუქარის განხორციელების საფუძვლიანი შიში, ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ან გამასწორებელი სამუშაოთი ვადით ერთ წლამდე ანდა თავისუფლების აღკვეთით ვადით ერთ წლამდე.