თბილისის მასშტაბით ავტობუსის ახალი მოსაცდელების დამონტაჟება უკვე დაწყებულია. ვალდებულება კომპანია ალმა-ტრანსპორტმა 2016 წლის აპრილში მიიღო, მას შემდეგ, რაც თბილისის მერიის მიერ გამოცხადებულ აუქციონში გაიმარჯვა.

როგორც თბილისის მერიის ტრანსპორტის საქალაქო სამსახურის პრესსამსახურის წარმომადგენელმა On.ge-ს განუცხადა, თბილისის რამდენიმე ადგილას უკვე არის ახალი მოსაცდელები, თუმცა პროცესი კვლავ გრძელდება:

"ნახევარი ჯერ არ იქნება დამონტაჟებული, გამარჯვებულმა კომპანიამ მოსაცდელები 2017 წლის აპრილამდე უნდა დაამონტაჟოს, თუმცა პროცესი შეიძლება წლის ბოლომდეც მორჩეს".

ავტობუსის ახალი მოსაცდელი თბილისში, რუსთაველის #25.

ფოტო: On.ge

25 აპრილს თბილისის მერიამ გამოაქვეყნა დოკუმენტი, რომელშიც წერია, რომ 2017 წლის აპრილის ბოლოსთვის თბილისში 700 ახალი, თანამედროვე ავტობუსის მოსაცდელი დამონტაჟდება.

კომპანია ალმა-ტრანსპორტმა დედაქალაქის მასშტაბით არანაკლებ 250 პრემიუმ კლასის ავტობუსის მოსაცდელი უნდა დაამონტაჟოს, საიდანაც 100-ს ლედ ეკრანი ექნება. გარდა ამისა, 300 მოსაცდელი მედიუმ კლასის, დანარჩენი კი ნორმალ კლასის იქნება.

მერიის ცნობით, მოსაცდელები შშმ პირებისთვისაც იქნება ადაპტირებული:

"1,3 მეტრი სიგანისა და 3-დან 5 მეტრამდე სიგრძის საქალაქო ტრანსპორტის მოსაცდელებში შეზღუდული შესაძლებლობების მქონე პირებისათვის გასაჩერებლი ადგილი იქნება გათვალისწინებული ისე, რომ ეტლის შემობრუნება 360 გრადუსით იქნება შესაძლებელი".

მერიის ინფორმაციით, კომპანიამ ავტობუსის მოსაცდელების განთავსებისთვის არანაკლებ 5 მილიონი ლარის ინვესტიცია უნდა განახორციელოს.

ბმულზე შეგიძლიათ იხილოთ საქალაქო ტრანსპორტის გაჩერების მოსაცდლების სრული სია.