ახალი პოლიტიკური ცენტრი - გირჩის ერთ-ერთი ლიდერი ვახტანგ მეგრელიშვილი, განათლების ახალ მინისტრს, ალექსანდრე ჯეჯელავას ღია წერილს უგზავნის და იმ პრობლემებისკენ მიუთითებს, რომლებიც მისივე თქმით, დღეს არსებობს განათლების სფეროში.

მეგრელიშვილი ფორმალური განათლების სისტემის ხარვეზებზე და მის არასასურველ შედეგებზე მიუთითებს. მისი თქმით, სწავლის დასრულების შემდეგ, ახალგაზრდები ცოდნას პრაქტიკაში ვერ იყენებენ და მაღალია უმუშევრობის დონე.

გირჩის ლიდერი ამჟამინდელ საგანმანათლებლო სისტემაზე ამბობს, რომ ის უბრალოდ შელამაზებული საბჭოთა განათლების სისტემაა. ასევე, წერილის ავტორს არგუმენტად მოაქვს ისიც, რომ სასკოლო და უნივერსიტეტის მისაღები გამოცდები საკმარისი არაა განათლების დონის ასამაღლებლად. მისი თქმით, საგანგაშოდ დაბალია ტესტირების შედეგები.

ვახტანგ მეგრელიშვილი წერილში ჩამოთვლის ყველა იმ საკითხს, რაც მისი აზრით, გასარკვევია, მათ შორის განათლების დაწყების ასაკი და სასკოლო განათლების პროგრამა. ავტორის თქმით, გადაუჭრელია სახელმძღვანელოების საკითხიც, რადგან "უფასო სახელმძღვანელოების" რეფორმის შემდეგ, ახალი სახელმძღვანელოები აღარ იწერება. სკოლებს სახელმძღვანელოებისა და სასწავლო მასალების არჩევანი, ფაქტობრივად, არ აქვს.

გირჩის ლიდერი ასევე მასწავლებლებზეც საუბრობს და ამბობს რომ მათი ანაზღაურება ორჯერ ნაკლებია ქვეყანაში საშუალო და თითქმის სამჯერ ნაკლები სახელმწიფო ბიუროკრატიის ხელფასებზე. ვახტანგ მეგრელიშვილის განცხადებით, მასწავლებლის პროფესიული რეგულირება დამატებით დანახარჯებს მოითხოვს, რაც კიდევ უფრო ამცირებს გონიერი ახალგაზრდების მიერ მასწავლებლის პროფესიის არჩევის შანსს.

ავტორი განათლების ვაუჩერული დაფინანსების ხარვეზებზეც მიუთითებს. წერილის ბოლოს, ვახტანგ მეგრელიშვილი მინისტრს კითხვით მიმართავს თუ რის შეცვლას აპირებს იგი საგანმანათლებლო ინდუსტრიაში.