საზოგადოებრივი მაუწყებლის ადმინისტრაციასა და პირველად პროფკავშირს შორის შეთანხმება მიღწეულია, მომავალი თვიდან მაუწყებლის 500-მდე თანამშრომელი 10 და 20 პროცენტით გაზრდილ ანაზღაურებას მიიღებს.

პროფკავშირის თქმით, დამსაქმებელთა ეს გადაწყვეტილება "მცირე გამარჯვებაა" მათ მოთხოვნებს სრულად არ აკმაყოფილებს:

"ჩვენი ბრძოლა არ დასრულებულა, ჩვენი ბრძოლა, ახლა იწყება.

ჩვენს შორის მიღწეული შუალედური შეთანხმება ადმინისტრაციას ხელფასების 10 და 20 % იან ზრდასთან ერთად, ფუნდამენტური ცვლილებების მიღების პროცესში ჩვენს ჩართულობასაც ავალდებულებს. იმედია, სწორედ ამ ცვლილებების შედეგად მთავარი რამ აღდგება ამ ტელევიზიაში - ეს ადამიანის დაფასებაა".

განცხადების მიხედვით, რეფორმირების პროცესში გაირკვევა, ადმინისტრაციის მხრიდან ამ დათმობაზე წასვლა რა მიზანს ემსახურებოდა, იყო ეს 500 თანამშრომლის მდგომარეობაში შესვლა თუ პროტესტის ჩახშობისა და ადმინისტრაციის "სიკარგის" დემონსტრირება.

საზოგადოებრივი მაუწყებლის თანამშრომელთა ნაწილმა, რომელთა შორის არიან მოამბის ჟურნალისტები, მემონტაჟეები და ტექნიკური პერსონალი, 18 მაისს, მაუწყებლის წინ გამაფრთხილებელი აქცია გამართა. ისინი მაუწყებლისგან სამუშაო პირობების გაუმჯობესებასა და ხელფასების მომატებას ითხოვდნენ.