საქართველოს ექს-პრეზიდენტის მიხეილ სააკაშვილის თქმით, მისი 11 წლის შვილი უკრაინის ბორისპოლის აეროპორტში რამდენიმე საათით დააკავეს. მისი განცხადებით, დაცვის თანამშრომელი, რომელიც მის შვილს ახლდა, მესაზღვრეებმა დააკავეს და ერთმანეთს დააშორეს. მისივე განმარტებით, საქართველოს კონსტიტუციის თანახმად მისი შვილი დაცვის ქვეშ მყოფია.

"თქვეს, რომ ჩემს შვილს აქ გადმომცემდნენ. აქ არავინ იყო. ჩვენ ახლახან მოვედით. ავიაკომპანიას ვეკითხებით და მათ არაფერი იციან. ამბობენ, რომ შსს დანიშნულების ადგილამდე მიიყვანს, თითქოს ეს ბანდეროლი იყოს. ეს ყველა კანონის დარღვევაა. სპეციალურად გამოვედი პირდაპირ ეთერში. აქ ვდგავარ. დამიბრუნეთ ჩემი შვილი. ჭკუიდან გადახვედით? 40 წუთია, სადღაც გაქრა. ის არასრულწლოვანია, 11 წლისაა. პოროშენკოს ვეკითხები, სად არის ჩემი შვილი? მოგეწონებოდა, პეტია, შენს შვილს ასე რომ მოქცეოდნენ? სწრაფად დამიბრუნეთ ჩემი შვილი!", - ამბობს ექს-პრეზიდენტი ვიდეომიმართვაში.

მიხეილ სააკაშვილმა ვიდეომიმართვის შემდეგ ფეისბუკზე კიდევ ერთი განცხადება გააკეთა, რომელშიც ამბობს, რომ მისი შვილი დააბრუნეს. მისივე თქმით, მგზავრებმა ბევრი სხვა კანონდარღვევის შესახებ უამბეს.

"ამიტომაც ეს უკანონობა მხოლოდ მე რომ მეხებოდეს, ასე საჯაროდ არ გიპასუხებდით. შემთხვევით ადრე დავბრუნდი კიევში, დაგვიანებით, თუმცა მაინც მოვასწარი აეროპორტში მოსვლა. რომ არ მოვსულიყავი, ალბათ, წინასწარი დაკავების იზოლატორში ეყოლებოდათ", - ამბობს მიხეილ სააკაშვილი.