ბოლო რამდენიმე დღის განმავლობაში ქართული ოცნების მთავრობაში არაერთი საკადრო ცვლილება განხორციელდა.

ბოლო ცვლილება კულტურის მინისტრს ეხება. დღეს, 15 სექტემბერს პრემიერმა ირაკლი კობახიძემ ამ პოზიციაზე მაია ბითაძე დანიშნა, რომელიც მანამდე პარლამენტის გარემოს დაცვისა და ბუნებრივი რესურსების კომიტეტს ხელმძღვანელობდა. ბითაძე მანამდე — 2017-2020 წლებში თბილისის მერის მოადგილე იყო, 2011-2017 წლებში კი გარემოს დაცვის მინისტრი.

ცნობისთვის, კულტურის მინისტრის პოსტი თიკა რუხაძემ ივლისის ბოლოს დატოვა და მიზეზად ჯანმრთელობის მდგომარეობა დაასახელა.

გარდა კულტურის მინისტრისა, იცვლება სახელმწიფო უსაფრთხოების სამსახურის ხელმძღვანელიც. ამ პოზიციას თამაზ ბორაშვილი დაიკავებს. მის კანდიდატურაზე პარლამენტი ხვალ იმსჯელებს. თამაზ ბორაშვილი 2017-22 წლებში საქართველოს შინაგან საქმეთა სამინისტროში იკავებდა გენერალური ინსპექციის უფროსის ბიუროს უფროსის მოადგილისა და გენერალური ინსპექციის უფროსის თანამდებობებს. 2022 წელს ის კვლავ დაბრუნდა სახელმწიფო უსაფრთხოების სამსახურში, სადაც იკავებდა სახელმწიფო უსაფრთხოების დეპარტამენტის თბილისის მთავარი სამმართველოს უფროსისა და სახელმწიფო უსაფრთხოების დეპარტამენტის დირექტორის თანამდებობებს. წელს კი დაინიშნა სახელმწიფო უსაფრთხოების სამსახურის უფროსის მოადგილედ.

თავის მხრივ თანამდებობა დატოვა სუს-ის უკვე ყოფილმა ხელმძღვანელმა გეკა გელაძემ. ის შინაგან საქმეთა სამინისტროში ბრუნდება, თუმცა ამჯერად მინისტრის მოადგილედ. ცნობისთვის, გეკა გელაძე თითქმის ერთი წელი შს მინისტრი იყო სუს-ში გადასვლამდე.

ცვლილებებია ფინანსთა სამინისტროს ორ მნიშვნელოვან უწყებაში — შემოსავლების სამსახურსა და საგამოძიემო სამსახურში. ფინანსთა სამინისტროს შემოსავლების სამსახურის უფროსად — მამუკა ბარათაშვილი, ფინანსთა სამინისტროს საგამოძიებო სამსახურის უფროსად კი მერაბ გამყრელიძე დაინიშნა. ფინანსტა სამინისტროს ცნობით, მამუკა ბარათაშვილი ამავე დროს, გააგრძელებს ფინანსთა მინისტრის მოადგილის თანამდებობაზე მუშაობას.

  • მამუკა ბარათაშვილი 2020-2021 წლებში იგი იყო სსიპ შემოსავლების სამსახურის უფროსის პირველი მოადგილე, 2011-2020 წლებში ხელმძღვანელობდა ფინანსთა სამინისტროს საგადასახადო და საბაჟო პოლიტიკის დეპარტამენტს, სხვადასხვა პერიოდში, ასევე, იყო შემოსავლების სამსახურის დავების დეპარტამენტის უფროსი, იურიდიული დეპარტამენტის ხელმძღვანელი.
  • მერაბ გამყრელიძეს მთავრობის ადმინისტრაციის ცნობით, ამ დრომდე შემოსავლების სამსახურის იურიდიული დეპარტამენტის უფროსის თანამდებობა ეკავა. მას საგამოძიებო სამსახურში მუშაობის მრავალწლიანი გამოცდილება აქვს. სხვადასხვა წლებში იყო საგამოძიებო დეპარტამენტის უფროსის მოადგილე, საგამოძიებო დეპარტამენტის აჭარისა და გურიის სამმართველოს უფროსი, საგამოძიებო დეპარტამენტის თბილისის მთავარი სამმართველოს უფროსის მოადგილე, ასევე, ეკავა სამხარაულის სასამართლო ექსპერტიზის ბიუროს უფროსის მოადგილის თანამდებობა, მუშაობდა საქართველოს მთავრობის ადმინისტრაციის რეგიონებთან ურთიერთობის დეპარტამენტის უფროსის მოადგილის პოზიციაზე.

შეგახსენებთ, რომ მამუკა ბარათაშვილმა შემოსავლების სამსახურის უფროსად მიხეილ მაღლაკელიძე შეცვალა, მერაბ გამყრელიძემ კი ფინანსთა სამინისტროს საგამოძიებო სამსახურის უფროსად ლევან ხარაბაძე. მაღლაკელიძემ და ხარაბაძემ თანამდებობები 12 სექტემბერს დატოვეს.

საკადრო ცვლილება განხორციელდა მიხეილ ყაველაშვილის ადმინისტრაციაშიც, რომლის უფროსად ლუკა ეხვაია დაინიშნა.

"ლუკა ეხვაია საერთაშორისო ურთიერთობების მკვლევარი და სპეციალისტია. კავკასიის უნივერსიტეტის სახელმწიფო მართვის სკოლაში მას საერთაშორისო ურთიერთობების ბაკალავრის ხარისხი აქვს მიღებული, ხოლო ბოლონიის უნივერსიტეტში — პოლიტიკური მეცნიერებების ფაკულტეტის მაგისტრის ხარისხი.

იგი ასევე იყო ლაიფციგის უნივერსიტეტის ჰუმანიტარულ და სოციალურ მეცნიერებათა სადოქტორო პროგრამის გლობალური და რეგიონული კვლევების მიმართულების დოქტორანტი, მოგვიანებით კი კავკასიის საერთაშორისო უნივერსიტეტში პოლიტიკის მეცნიერების დოქტორანტი," — წერს ადმინისტრაცია.

ცნობისათვის, ეხვაია მიხეილ ყაველაშვილის მრჩეველი 2025 წლის მარტში გახდა. "რადიო თავისუფლებას" ცნობით, ყაველაშვილის მრჩევლის პოზიციაზე საერთაშორისო ურთიერთობის მიმართულებით ლუკა ეხვაია სახელმწიფო ბიუჯეტიდან ყოველთვიურად 6424 ლარს იღებდა ანაზღაურების სახით.

მოსალოდნელია თუ არა კიდევ საკადრო ცვლილებები — ამ კითხვას გუშინ პრემიერმინისტრმა ირაკლი კობახიძემ უპასუხა. მისი თქმით, "ახლო მომავალში რაიმე არსებით ცვლილებას არ ველოდებით".