პრეზიდენტის ადმინისტრაციის უფროსად ლუკა ეხვაია დაინიშნა. ადმინისტრაციის ინფორმაციით, "ის სხვადასხვა დროს საქართველოს პრეზიდენტის მრჩევლისა და თანაშემწის პოზიციებს იკავებდა საგარეო საკითხებში".

"ლუკა ეხვაია საერთაშორისო ურთიერთობების მკვლევარი და სპეციალისტია. კავკასიის უნივერსიტეტის სახელმწიფო მართვის სკოლაში მას საერთაშორისო ურთიერთობების ბაკალავრის ხარისხი აქვს მიღებული, ხოლო ბოლონიის უნივერსიტეტში — პოლიტიკური მეცნიერებების ფაკულტეტის მაგისტრის ხარისხი.

იგი ასევე იყო ლაიფციგის უნივერსიტეტის ჰუმანიტარულ და სოციალურ მეცნიერებათა სადოქტორო პროგრამის გლობალური და რეგიონული კვლევების მიმართულების დოქტორანტი, მოგვიანებით კი კავკასიის საერთაშორისო უნივერსიტეტში პოლიტიკის მეცნიერების დოქტორანტი," — წერს ადმინისტრაცია.

ცნობისათვის, ეხვაია მიხეილ ყაველაშვილის მრჩეველი 2025 წლის მარტში გახდა. "რადიო თავისუფლებას" ცნობით, ყაველაშვილის მრჩევლის პოზიციაზე საერთაშორისო ურთიერთობის მიმართულებით ლუკა ეხვაია სახელმწიფო ბიუჯეტიდან ყოველთვიურად 6424 ლარს იღებდა ანაზღაურების სახით.

საზოგადოება ეხვაიას საავტორო TikTok-არხიდან იცნობდა, სახელწოდებით "ფუკოს ქანქარა", სადაც ბევრს საუბრობდნენ საერთაშორისო პოლიტიკაზე და ქვეყანაში მიმდინარე მოვლენებზე, მათ შორის რუსეთ-უკრაინის ომსა და ამერიკის პრეზიდენტ დონალდ ტრამპის გადაწყვეტილებებზე.