საბერძნეთსა და სერბეთში საქართველოს ელჩის, იოსებ ნანობაშვილის განცხადებით, საქართველოს მოქალაქეებთან დაკავშირებული კრიმინალური შემთხვევები საბერძნეთთან ურთიერთობებში უმთავრეს პრობლემად რჩება. ელჩი სამართალდამცავების მიერ საქართველოს მოქალაქეების დაკავების ფაქტებს ფეისბუკზე გამოეხმაურა.

"ზედმეტია იმის განმარტება, რომ ეს პრობლემა უაღრესად დიდ ზიანს აყენებს, როგორც ჩვენი ქვეყნისა და ჩვენი ერის იმიჯს, ასევე, საელჩოს საქმიანობას. მსგავსი ფაქტები მნიშვნელოვნად აფერხებენ საბერძნეთის ხელისუფლებასთან ჩვენი ქვეყნისთვის მნიშვნელოვან საკითხებზე მოლაპარაკებას, ასევე, საქართველოს მოქალაქეების მიმართ ბერძნულ საზოგადოებაში ქმნიან ძალზე ნეგატიურ ფონს", - ნათქვამია განცხადებაში.

ნანობაშვილის თქმით, ამგვარი რეალობის მიუხედავად, საელჩო საბერძნეთის მთავრობის შესაბამისი სტრუქტურების უმაღლეს პირებთან მუდმივ დიალოგს აწარმოებს ორ საკითხზე:

  • განუხრელად იყოს დაცული საქართველოს მოქალაქეების უფლებები, მიუხედავად იმ დანაშაულის სიმძიმისა, რომელშიც მათ ედებათ ბრალი;
  • არ იქნას დაშვებული მცდარი, ორაზროვანი ან გადაუმოწმებელი ინფორმაციის გავრცელება დანაშაულში ბრალდებული ჩვენი თანამემამულეების შესახებ.