ევროპარლამენტის პრეზიდენტმა, მარტინ შულცმა დიდი ბრიტანეთის რეფერენდუმის შედეგების შესახებ კომენტარი გააკეთა პრესკონფერენციაზე. მისი თქმით, ბრიტანელმა ამომრჩევლებმა სუვერენული გადაწყვეტილება მიიღეს, ევროკავშირის მხრიდან კი საჭიროა სამომავლო ნაბიჯების განხორციელება:

"ჩვენ ძალიან ვწუხვართ ბრიტანელი ამომრჩევლების გადაწყვეტილების გამო, მაგრამ ეს იყო მათი აზრის სუვერენული გამოხატულება, რომ დატოვონ ევროკავშირი. ჩვენ ახლა სამომავლო ნაბიჯებზე და პროცედურებზე უნდა ვიფიქროთ. მას შემდეგ რაც ბრიტანეთმა გასვლა გადაწყვიტა კავშირიდან. დარჩენილმა წევრებმა უნდა ვიფიქროთ თუ როგორ გავაუმჯობესებთ და დავიცვათ ევრო ზონა".

პრესკონფერენციის დაწყებამდე შულცმა ტვიტერზე დაწერა, რომ ბოლო 40 წლის განმავლობაში, ევროკავშირისა და დიდი ბრიტანეთის ურთიერთობა გაურკვეველი იყო, ახლა კი ყველაფერი ცხადი გახდა. მისივე თქმით, ამომრჩევლის სურვილი პატივსაცემია.

დიდი ბრიტანეთის ამომრჩეველთა უმრავლესობამ, 52-მა პროცენტმა მხარი დაუჭირა ქვეყნის ევროკავშირიდან გამოსვლას. ევროკავშირში დარჩენის მომხრე მხოლოდ 48 პროცენტი აღმოჩნდა.