სურსათის ეროვნული სააგენტოს განცხადებით, აზიური ფაროსანა არ წარმოადგენს საფრთხეს არც ადამიანის და არც ცხოველის ან ფრინველის ჯანმრთელობისთვის.

სააგენტო ასევე განმარტავს, რომ მავნებელს არ გადააქვს დაავადებები და ცხოველის/ფრინველის მიერ საკვებად მიღების შემთხვევაში არ არის მომწამვლელი:

"როგორც ყველა მწერს - კალიას, ხოჭოს, პეპელას, რომელიც მდიდარია ცილებით, აზიურ ფაროსანასაც ეტანებიან ფრინველები. როგორც ცნობილია, აზიურ ფაროსანას აქვს დამცავი მექანიზმი - იგი სპეციფიკურ სუნს უშვებს. არ არსებობს დადასტურებული კვლევა, რომ ცხოველის/ფრინველის მიერ საკვებად მიღების შემთხვევაში, აღნიშნული სპეციფიკური სუნი ხორცის საგემოვნო თვისებებზე აისახება, თუმცა, ხშირად უსიამოვნო ფსიქოლოგიურ განწყობას ქმნის".

სააგენტო მოსახლეობას ურჩევს, რომ თუკი უსიამოვნო ფსიქოლოგიური განწყობა ექნებათ, გამოიყენონ სპეციალიზირებული ფერმის სტანდარტი, რაც გულისხმობს მოცდის პერიოდს და ცხოველის/ფრინველის დაკვლამდე 10 დღით ადრე საკვები დანამტები (მაგ., თევზის ფქვილი) კვების რაციონიდან ამოიღონ.