მდინარე მტკვრიდან 2 მილიონ ლარზე მეტი ღირებულების ინერტული მასალის უკანონოდ მოპოვების ფაქტზე 4 პირი დააკავეს — ინფორმაციას ფინანსთა სამინისტროს საგამოძიებო სამსახური ავრცელებს.

სამსახურის ცნობით, ამავე სისხლის სამართლის საქმეზე ბრალდება კიდევ სამ ფიზიკურ და სამ იურიდიულ პირს წარედგინა.

გამოძიებით დადგინდა, რომ ბრალდებულები, შესაბამისი ლიცენზიის გარეშე, ქვემო ქართლის რეგიონში, მდინარე მტკვრიდან, სისტემატურად მოიპოვებდნენ ინერტულ მასალას, რომელსაც შემდგომ სხვადასხვა მეწარმე სუბიექტზე ყიდდნენ.

სამსახურის განცხადებით, უკანონოდ მოიპოვეს 343 608 კუბური მეტრი ინერტული მასალა, რომლის ღირებულება 2 138 771 ლარს შეადგენს. ამასთან, ბრალდებულებმა უკანონო საქმიანობის შედეგად მიღებული 2 138 771 ლარის ოდენობის შემოსავლის ლეგალიზაცია მოახდინეს.

საქმეზე გამოძიება მიმდინარეობს საქართველოს სისხლის სამართლის კოდექსის 192-ე მუხლის მე-2 ნაწილის "ა" ქვეპუნქტითა და 194-ე მუხლის მე-3 ნაწილის "ა" და "გ" ქვეპუნქტებით, რაც სასჯელის სახედ 9-დან 12 წლამდე თავისუფლების აღკვეთას ითვალისწინებს.