დე-ფაქტო სამხრეთ ოსეთი საგარეო საქმეთა მინისტრმა დმიტრი მედოევმა განაცხადა, რომ სამხრეთ ოსეთმა გენოციდის აღიარებისთვის უნდა იბრძოლოს. მისი თქმით, სავალდებულოა, რომ რაც შეიძლება მეტმა ქვეყანამ გაიგოს სამხრეთ ოსეთის გენოციდის შესახებ.

"სამხრეთ ოსეთის მოსახლეობამ საკუთარ თავზე არაერთხელ გამოსცადა გენოციდი. იმის შესახებ თუ რა მოხდა უნდა დაიწეროს წიგნები, გადაიღონ ფილმები. ბევრმა არ იცის, მათ შორის, ევროპაში", - ამბობს მედოევი.

მისი თქმით, დე-ფაქტო რესპუბლიკის საგარეო საქმეთა უწყება ქვეყნებთან ურთიერთობების დამყარებისას ცდილობს, რომ ქვეყნის მიმართ ინტერესი გაუჩინოს. მედოევის განმარტებით, საბჭოთა კავშირის დროს სამხრეთ ოსეთის გენოციდის შესახებ არავინ საუბრობდა:

"ამაზე არ წერდა პრესა, ოსი ხალხის ტრაგედიის შესახებ არავინ საუბრობდა, მაგრამ ჩვენი ხალხის მეხსიერებაში 1920 წლის გენოციდი მუდამ დარჩება. დაახლოებით, 40 ათასი ადამიანი გააძევეს სამხრეთ ოსეთიდან, 5 ათასზე მეტი ადამიანი მოკლეს. ფაქტობრივად, ქართველმა ნაციონალისტებმა მთელი ოსეთი გადაწვეს".

როგორც მედოევმა განაცხადა, ისტორია კიდევ განმეორდა, მაგრამ ხალხის სიძლიერისა და რუსეთის მხარდაჭერით მათ დამოუკიდებლობა მოიპოვეს.