სომხეთის სამოციქულო ეკლესიასა და მთავრობას შორის გამწვავებული უთანხმოების ფონზე, სომხეთის ხელისუფლებამ მეოთხე მაღალი რანგის სასულიერო პირი — მთავარეპისკოპოსი არშაკ ხაჩატრიანი დააკავა . მას ბრალად 2018 წელს კათოლიკოს გარეგინ II-ის წინააღმდეგ გამართული საპროტესტო აქციის მონაწილის ზურგჩანთაში ნარკოტიკების ჩადების ორგანიზება ედება.

პარასკევს ხაჩატრიანს ორთვიანი წინასწარი პატიმრობა შეეფარდა.

ის ერთი დღით ადრე სომხეთის ეროვნული უსაფრთხოების სამსახურმა (NSS) დააკავა საგამოძიებო კომიტეტის შენობიდან გამოსვლისას, სადაც იგი დაკითხვაზე გაჟონილ ვიდეოსთან დაკავშირებით დაიბარეს, სადაც ის სავარაუდოდ ინტიმურ სცენაშია გადაღებული.

ხაჩატრიანის ადვოკატმა, არსენ ბაბაიანმა, განაცხადა, რომ დაკითხვა დაკავების საბაბად გამოიყენეს და ამტკიცებდა, რომ დამატებითი დაკითხვის რაუნდს რეალური მიზანი არ ჰქონდა და დასმულ კითხვებს "აბსურდულ და უაზრო" უწოდა.

საგამოძიებო კომიტეტის ცნობით, სისხლის სამართლის საქმე, წინასწარი შეთანხმებით,მოქმედი ჯგუფის მიერ საჯარო ადგილას ნარკოტიკების უკანონო რეალიზაციას ეხება.

"ჩვენ არასდროს გვსმენია უფრო აბსურდული რამ", — თქვა ბაბაიანმა Facebook-ის პირდაპირ ეთერში.

თუმცა, მან აღნიშნა, რომ არსებობს წინაარდეგობა მიკუთვნებულ ქმედებებსა და ბრალდებებს შორის. ხაჩატრიანს ბრალი, მისი ერთ-ერთი ხელქვეითის დახმარებით, მომიტინგეების ზურგჩანთაში ნარკოტიკების ჩადების ორგანიზებაში ედება, რაც მონაწილის დისკრედიტაციას ისახავდა მიზნად. ბაბაიანი აღნიშნავს, რომ სისხლის სამართლის საქმეში ნარკოტიკების "გაყიდვა" იგულისხმება და არა "ნარკოტიკების ჩადებით" დემონსტრანტის დისკრედიტაციის მცდელობა.

თავის მხრივ, ბაბაიანმა ხელისუფლება, მის წინააღმდეგ ამ ბრალდებების წაყენებით, პოლიტიკური მიზეზების გამო, ხაჩატრიანის დისკრედიტაციის მცდელობაში დაადანაშაულა. მან ასევე ინციდენტის ქრონოლოგიაზე მიუთითა, რომელიც 2018 წელს მოხდა.

ბაბაიანის თქმით, მაშინ "ზოგიერთმა ადამიანმა" გამოძიების დროს გამოთქვა ეჭვი, რომ ზურგჩანთაში ნაპოვნი ნარკოტიკების "ჩადება" შესაძლოა ხაჩატრიანის მიერ ყოფილიყო ორგანიზებული.

ამის შემდეგ, ბაბაიანმა განაცხადა, რომ საქმეში "ბოლო ქმედება", დამატებითი დეტალების გარეშე, 2025 წლის ივლისში მოხდა. 4 დეკემბერს საგამოძიებო ჯგუფი შეიქმნა და ხაჩატრიანის წინააღმდეგ სისხლისსამართლებრივი დევნა დაიწყო, რასაც მისი დაპატიმრება მოჰყვა.

"ეს ქრონოლოგია თავისთავად იმის დასტურია, თუ როდის იყო პოლიტიკური ბრძანება გაცემული". "როდის გასცა პოლიტიკურმა ხელისუფლებამ ბრძანება მთავარეპისკოპოს არშაკის წინააღმდეგ პოლიტიკური დევნის განხორციელების შესახებ, მისი შეხედულებებისა და განცხადებების გამო", — განაცხადა ბაბაიანმა.

მან ხაჩატრიანის დაკავება მთავრობის მიერ ეკლესიის წინააღმდეგ განხორციელებული ქმედებების უფრო ფართო კონტექსტში მოათავსა, რომლის ბოლო რაუნდი მაისის ბოლოს განახლდა, როდესაც ხელისუფლება გარეგინ II-ს შვილის გაჩენაში ადანაშაულებდა, რითაც ცელიბატის აღთქმა დაარღვია და ეკლესიის მეთაურის თანამდებობის დაკავების უფლება არ მისცა.

ეკლესიამ პარასკევს დაპატიმრება "მკაცრად დაგმო", ბრალდებებს კი "შეთითხნილი და უსაფუძვლო" უწოდა და ხაჩატრიანის და სხვა დაპატიმრებული სასულიერო პირების დევნის "დაუყოვნებლივ შეწყვეტა" მოითხოვა .

"ეს ქმედება ეკლესიის წინააღმდეგ ცოტა ხნის წინ დაწყებული რეპრესიების გამოვლინება და სასულიერო პირების პოლიტიკურად მოტივირებული დევნის გაგრძელებაა", — ნათქვამია განცხადებაში.

ამ კვირის დასაწყისში პრემიერმინისტრმა ნიკოლ ფაშინიანმა გარეგინ II უცხო ქვეყნის აგენტობასა და "უცხოური სპეცსამსახურის უფროსი ლეიტენანტის მორჩილებაში" პირდაპირ დაადანაშაულა.

ნოემბრის ბოლოს, 10-მა მაღალი რანგის მღვდელმა განცხადება გაავრცელა, რომელშიც გარეგინ II "ნებაყოფლობით შვებულებაში წასვლასთან" დაკავშირებით მოლოდინია გამოთქმული.

განცხადება ფაშინიანთან მათი უპრეცედენტო შეხვედრიდან, რომელიც პროსამთავრობო მედიის მიერ გავრცელებული საკამათო განცხადების გამო დაძაბულობის გამწვავების შემდეგ გაიმართა, მალევე გაკეთდა. განცხადებაში გარეგინ II-ს არქიეპისკოპოს ხაჩატრიანის სავარაუდო მონაწილეობით გაჟონილ ინტიმურ ვიდეოსთან დაკავშირებული სკანდალის დაფარვის მცდელობაში ადანაშაულებდა .

ხუთშაბათს, 27-მა მაღალი რანგის სასულიერო პირმა გარეგინ II-ის მიმართ "უპირობო ერთგულება" გამოხატა. განცხადებაში ასევე "ეკლესიაში არსებული საკითხების პოლიტიკური ჩარევით მოგვარების ნებისმიერი მცდელობა მიუღებლად და საშიშადაა" მიჩნეული.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.