საერთაშორისო სატელევიზიო აკადემიამ ცოტა ხნის წინ ტვიტერზე ოფიციალური განცხადება გაავრცელა, სადაც წერია, რომ დაგეგმილი ღონისძიება, რომელზეც კევინ სპეისის საპატიო ემის გადასცემდნენ, აღარ გაიმართება.

როგორც აკადემიაში ამბობენ, გადაწყვეტილება მას შემდეგ მიიღეს, რას მსახიობმა და მუსიკოსმა ენტონი რაპმა კევინ სპეისის სექსუალურ შევიწროებაში დასდო ბრალი. მსახიობის თქმით, ეს შემთხვევა 1986 წელს მოხდა, როცა ის 14, ხოლო კევინ სპეისი კი 26 წლის იყო. ბრალდების შემდეგ ოსკაროსანმა მსახიობმა თავის ტვიტერზე დაწერა, რომ ამ შემთხვევის შესახებ არაფერი ახსოვს, თუმცა ბოდიში მაინც მოიხადა. ამავე განცხადებაში სპეისმა ქამინგ აუთი გააკეთა და თქვა, რომ გეია.

გუშინვე გახდა ცნობილი, რომ ნეტფლიქსის სერიალი House of cards დაიხურა.

თუმცა, როგორც Netflix-ის პრესასთან ურთიერთობის სამსახურში ამბობენ, რომ სერიალის დასრულების შესახებ გადაწყვეტილება რამდენიმე თვის წინ მიიღეს და ეს არ არის სექსუალური შევიწროების შესახებ ბრალდების საპასუხოდ გადადგმული ნაბიჯი.