აზერბაიჯანის პრეზიდენტი ილჰამ ალიევი 20 ივლისს გერმანიას ეწვია, სადაც გერმანიის კანცლერ ფრიდრიხ მერცს შეხვდა. ლიდერებმა ხელი მოაწერეს დეკლარაციას, რომლითაც სტრატეგიული პარტნიორობის დოკუმენტი გაფორმდა.

OC Media-ს ცნობით, 21 ივლისს ალიევი გერმანიის პრეზიდენტ ფრანკ-ვალტერ შტაინმაიერსა და კანცლერ მერცს შეხვდა. წინა დღეს კი — გერმანიის ეკონომიკის აღმოსავლეთის კომიტეტის თავმჯდომარეს, მიხაელ ჰარმსს.

პრეზიდენტის ვებგვერდის ცნობით, მხარეებმა განიხილეს "ერთობლივ მუშაობაში" ორივე ქვეყნის ბიზნესწრეების "მზარდი ინტერესი" და აღნიშნეს, რომ ორივე მხარეს სურს ამგვარი საქმიანობის "ინსტიტუციონალიზაციის" გზების გამოკვლევა.

მხარეებმა ხაზი გაუსვეს "არსებულ პოტენციალს ტრადიციულ და ალტერნატიულ ენერგეტიკაში, შესაძლებლობებს დაკავშირებადობაში, ტრანსპორტსა და ლოგისტიკაში, შუა დერეფნის (Middle Corridor) ჩათვლით".

შტაინმაიერთან მოლაპარაკებების დროს ალიევმა აღნიშნა "აზერბაიჯანის როლი ევროპის ენერგეტიკულ უსაფრთხოებაში" და ასევე თქვა, რომ აზერბაიჯანი ამჟამად "გაზის ექსპორტს გერმანიასა და ავსტრიაშიც ახორციელებს".

ალიევმა ყურადღება გაამახვილა ევროკომისიის პრეზიდენტის, ურსულა ფონ დერ ლაიენის ბაქოში განხორციელებულ ბოლო ვიზიტზე და ხაზი გაუსვა აზერბაიჯანსა და ევროკავშირს შორის "ურთიერთობების განვითარებას".

იმავე დღეს ალიევმა და მერცმა სტრატეგიული და ორმხრივი პარტნიორობის დეკლარაციას მოაწერეს ხელი.

პროსახელისუფლებო მედია საშუალება APA წერდა, რომ ორმა ლიდერმა "დაადასტურა ორმხრივი სურვილი, გააღრმავონ პარტნიორობა და თანამშრომლობა ურთიერთნდობასა და საერთო ინტერესებზე დაყრდნობით სხვადასხვა სფეროში".

ორმა მხარემ ასევე შეაქო "ისტორიული პროგრესი" სომხეთ-აზერბაიჯანის სამშვიდობო მოლაპარაკებებში, რომელიც 2025 წლის აგვისტოს ვაშინგტონის სამიტს მოჰყვა.

დეკლარაციაში აღნიშნული იყო "აზერბაიჯანსა და ევროკავშირს შორის პარტნიორობის სტრატეგიული მნიშვნელობა" და "თანამშრომლობის გაფართოება, რომელიც მიმართულია პოლიტიკური დიალოგისა და პრაქტიკული ჩართულობის შემდგომი გაღრმავებისკენ".