27 ივნისს "ქართული ოცნების" ახალგაზრდული ორგანიზაციის შემაჯამებელი კონფერენცია გაიმართა, რომელსაც "ქართული ოცნების" დამფუძნებლის, ბიძინა ივანიშვილის შვილი ცოტნე ივანიშვილი დაესწრო. კონფერენციის დასრულების შემდეგ მან ჟურნალისტებთან 26 ივნისს პარლამენტში მომხდარ ჩხუბზე გააკეთა კომენტარი და თქვა რომ "პროვოკაცია იყო ვერბალურიც და ფიზიკურიც მათი [გახარიას პარტიის] მხრიდან.

"ეს ყველაფერი არის ძალიან ცუდია, პირველ რიგში, ჩვენი ქვეყნის იმიჯისთვის, ზოგადად საქართველოსთვის, ნებისმიერ ადამიანს, ვისაც საქართველო უყვარს თავისთავად ეწყინებოდა ეს მომხდარი ფაქტები, გული დასწყდებოდათ, მათ შორის მეც, რა თქმა უნდა ძალიან გული დამწყდა, ძალიან ცუდი სანახავი იყო ეს ყველაფერი, არასასიამოვნო იყო და ძალიან ცუდი ქვეყნის იმიჯისთვის, რაც მე პირადად სხვა შეკითხვას მიჩენს იმასთან დაკავშირებით, თუ რა მიზანი ჰქონდა ოპოზიციური პარტიის წევრებისგან ამ პროვოკაციას, რას ემსახურებოდა ეს პროვოკაცია, რაში სჭირდებოდათ ვერბალური და ფიზიკური ძალადობის დაწყება, კადრებს თუ გადავხედავთ ნათლად ჩანს.

[...] პროვოკაცია იყო ვერბალურიც და ფიზიკურიც მათი მხრიდან. ხელი როგორ მოხვდა, რა ფორმით მოხვდა, რა სიძლიერით მოხვდა, ამის ზომა როგორ უნდა დავიწყოთ. ფაქტი ფაქტად რჩება, რომ პროვოკაცია მოდიოდა გიორგი გახარიას პარტიის წევრებიდან.

[...] საკმაოდ მძიმე შეურაცხყოფები იყო მიყენებული. კადრებშიც გამოჩნდა არაერთი შეურაცხყოფა.

[...] როგორც უკვე ვთქვი, ძალიან უშნო საყურებელი იყო ეს ყველაფერი, რა თქმა უნდა, ძალიან სამწუხაროა და ძალიან ცუდია ეს ყველაფერი საქართველოსთვის. სხვათა შორის თუ გადახედავთ, ძალიან ბევრ წამყვან ევროპულ ქვეყანაშიც, იაპონიაშიც, კორეაშიც, აშშ, საკმაოდ ხშირია ასეთი ტიპის კონფლიქტები პარლამენტში, რაც აგრეთვე არის ძალიან უშნო. ძალიან ხშირია ეს ბევრ მოწინავე ქვეყანაში, რომ მსგავსი ტიპის კონფლიქტი მოხდეს.

ცოტა სასაცილოა ამდენად გამახვილება გამოძიებასთან დაკავშირებით იმ ფონზე, რომ სამწუხაროდ ასეთი რაღაცები ძალიან ხშირია", — თქვა ცოტნე ივანიშვილმა.

მისივე თქმით, მამამისის, ბიძინა ივანიშვილის რეაქცია პარლამენტში მომხდარ დაპირისპირებაზე "ნებისმიერი ქართველის რეაქციას უტოლდება" და "თვითონაც აუცილებლად დაინტერესდება იმით, თუ რას ემსახურებოდა ეს პროვოკაცია".

"მამაჩემი რეაქცია თუ გაინტერესებთ, ნებისმიერი ქართველის რეაქციას უტოლდება ამ კუთხით, ჩემი გადმოსახედიდან. ერთად არ გვინახავს ეს კადრები. როგორც გითხარით, როგორც ნებისმიერი ქართველისთვის, ისევე მისთვის, ეს ყველაფერი იყო, რა თქმა უნდა, სამწუხარო დასანახი. პირადად თვითონაც აუცილებლად დაინტერესდება იმით, თუ რას ემსახურებოდა ეს პროვოკაცია. როგორც უკვე ვთქვი, რომ ვერბალური და ფიზიკური ძალადობაც დაიწყო გიორგი გახარიას პარტიის წევრებმა, მაგრამ ძალიან მძიმე შეურაცხყოფები მოისმინეს "ქართული ოცნების" გუნდის წარმომადგენლებმა. მათაც გააჩნიათ თავისი ღირსება", — განაცხადა ცოტნე ივანიშვილმა.

მან მედიასთან საუბრისას ისიც თქვა, რომ "პოლიტიკაში ჩართვის არანაირი ინტერესი არ აქვს". ფილოსოფიის და ხელოვნების ისტორიას იკვლევს და ხატავს, "ქართული ოცნების" ახალგაზრდული ორგანიზაციის კონფერენციაზე კი მხოლოდ სტუმრის სტატუსით იმყოფება..

"ძალიან ბევრჯერ დაისვა ეს საკითხი და გადაჭრით ვიტყვი, რომ არანაირი ინტერესი არ მაქვს პოლიტიკაში ჩართვის. არასდროს მისაუბრია იმასთან დაკავშირებით, თუ რა მიმართულებით ვსწავლობ, აკადემიურად იქნება ეს, თუ რას ვაკეთებ, თუმცა საკმაოდ ბევრი წელია, ჩრდილში, არ ვასაჯაროებ ამ ნამუშევრებს, მაგრამ ვხატავ ძალიან ბევრს, აკადემიური მიმართულებით ფილოსოფიის და ხელოვნების ისტორიას ვიკვლევ. ეს არის ორი სფერო, რომელიც მე პირადად ძალიან მაინტერესებს. ამის იქით, რა თქმა უნდა ვგულშემატკივრობ მსგავსი ტიპის ინიციატივებს ჩვენი ახალგაზრდული ორგანიზაციისგან, ამიტომ თავისთავად სტუმრის სტატუსით ვესწრები ამ შეხვედრებს, მაგრამ პოლიტიკაში ჩართვის არანაირი ინტერესი არ მაქვს," - განაცხადა ცოტნე ივანიშვილმა.