შინაგან საქმეთა სამინისტრომ უკანონო ბრუნვიდან ამოღებული სხვადასხვა სახის ნარკოტიკული საშუალება, ფსიქოტროპული და ახალი ფსიქოაქტიური ნივთიერებები გაანადგურა. ამოღებული ნივთიერებების საერთო წონა 700 კგ-მდეა, ხოლო მათი ღირებულება ე.წ. შავ ბაზარზე ₾37 მლნ-ს აჭარბებს.

უწყების განცხადებით, პროცესი გარემოსდაცვითი და თანამედროვე სტანდარტების სრული დაცვით, სპეციალურ მაღალტემპერატურულ ღუმელში განხორციელდა. ნარკოტიკული საშუალებების განადგურებას შსს-ს მუდმივმოქმედი კომისიის წევრებთან ერთად, სხვა პასუხისმგებელი უწყებების წარმომადგენლებიც ესწრებოდნენ.

"შინაგან საქმეთა მინისტრის ბრძანების საფუძველზე შექმნილმა მუდმივმოქმედმა კომისიამ, საქართველოს მასშტაბით სხვადასხვა დროს ჩატარებული საგამოძიებო ღონისძიებების შედეგად, უკანონო ბრუნვიდან ამოღებული 700 კილოგრამამდე ნარკოტიკული საშუალებები გაანადგურა, რომელთა საერთო ღირებულება ე.წ. შავ ბაზარზე 37 მილიონ ლარს აღემატება.

საექსპერტო-კრიმინალისტიკური დეპარტამენტის თანამშრომლებმა, სპეციალურ თანამედროვე სტანდარტების მაღალტემპერატურულ ღუმელში (ინსინერატორი) გაანადგურეს განსაკუთრებით დიდი ოდენობით სხვადასხვა სახის ნარკოტიკული საშუალება, მათ შორის: "ჰეროინი", "კოკაინი", "ალფა-პვპ", "კლეფედრონი", "მდმა", "ბუპრენორფინი", "ტრამადოლი", "დიაზეპამი", "კოდეინი", "მეთადონი" და "კანაფი". ასევე, განადგურდა ფსიქოტროპული და ახალი ფსიქოაქტიური ნივთიერებები.

არსებული კანონმდებლობის შესაბამისად, ნარკოტიკების განადგურების პროცესში, რომელიც გარემოსდაცვითი თანამედროვე სტანდარტების შესაბამისად ჩატარდა, მუდმივმოქმედი კომისიის წევრ შინაგან საქმეთა სამინისტროს თანამშრომლებთან ერთად, გენერალური პროკურატურისა და შრომის, ჯანმრთელობისა და სოციალური დაცვის სამინისტროს წარმომადგენლები მონაწილეობდნენ", — წერია უწყების განცხადებაში.