ხშირად ხდება ხოლმე, რომ კურიერის მიერ მოტანილ ამანათს ვერ იბარებთ, რადგან სახლში არ ხართ. ამ დროს კურიერი კარზე წარწერას გიტოვებთ, რომ წამოსაღებად თქვენს ნივთებს თავად მიაკითხოთ.

Amazon თვლის, რომ ეს პრობლემა ძალიან შემაწუხებელია როგორც მომხმარებლებისთვის, ისე კურიერებისთვისაც, რადგან უამრავი რესურსი უშედეგოდ იხარჯება. სწორედ ამიტომ, კომპანიამ გადაწყვიტა შეექმნა მოწყობილობა, რომელიც ამ პრობლემას მოაგვარებდა.

შედეგად, მათ შექმნეს პროდუქტი, რომელსაც „ამაზონის გასაღები“ დაარქვეს. ეს არის ჭკვიანი საკეტისა და კამერისგან შექმნილი მოწყობილობაა, რომელიც კურიერებს, და არამარტო მათ, საშუალებას აძლევს შევიდნენ თქვენს სახლში მაშინაც კი, როცა შინ არავინაა.

აი, როგორ მუშაობს ის: პროდუქტის შეკვეთისას თუკი სახლში შეტანის სერვისს აირჩევთ, კურიერს ექნება უფლება, რომ ამანათის დასატოვებლად შევიდეს თქვენს სახლში. აღსანიშნავია, რომ კურიერს სახლში ამაზონი უშვებს და თავად პიროვნებას არ აქვს არც სახლის გასაღები და არც რამე სხვა საშუალება, რომ თვითნებურად შევიდეს. „ამაზონის გასაღებს“ აქვს დამცავი კამერის სერვისიც, რომელიც საშუალებას გაძლევთ, რომ რეალურ დროში უყუროთ როგორ ტოვებენ თქვენ სახლში ამანათს.

ამასთან ერთად, ეს პროდუქტი არ არის მხოლოდ კურიერული მომსახურებისთვის განკუთვნილი. როგორც Amazon ამბობს, ამ პროდუქტის გამოყენება მეგობრების, მშობლების, ოჯახის სხვა წევრების, ძაღლის გამსეირნებლების, ძიძებისა და დამლაგებლების შემთხვევაშიც შეგიძლიათ.