ბრიტანულმა გამოცემა Economist-მა საქართველოს მიერ ევროპისთვის მიწოდებული თხილის შესახებ გამოაქვეყნა სტატია სათაურით ნაციონალიზმი და თხილი, საქართველო და აფხაზეთი ნუტელას წარმოებას ართულებენ. სტატიაში ნათქვამია, რომ შავი ზღვითა და რუსეთით გარშემორტყმული საქართველო ბოლო რამდენიმე წელი ევროპასთან დაახლოებას ცდილობს და ამაში დიდი როლს სწორედ თხილი თამაშობს.

როგორც სტატიის ავტორები ამბობენ, 2007 წელს ტკბილეულის ცნობილმა კომპანია ფერერომ დასავლეთ საქართველოში თავისი წარმომადგენლობა გახსნა, საიდანაც შოკოლადის პასტის, ნუტელას დასამზადებლად კომპანიას თხილით ამარაგებს. მალევე, საქართველო, თურქეთისა და იტალიის შემდეგ, თხილის ყველაზე მსხვილი ექსპორტიორი გახდა.

სტატიაში აღნიშნულია, რომ 2014 წელს საქართველომ და ევროკავშირმა თავისუფალი ვაჭრობის ხელშეკრულება (Deep and Comprehensive Free Trade Agreement (DCFTA) გააფორმეს, თუმცა მოლოდინი, რომ თხილის მიწოდება უფრო გაადვილდებოდა, არ გამართლდა.

"ქართული თხილის ექსპორტის 10 პროცენტი მოდის რუსეთის მიერ მხარდაჭერილი აფხაზეთის ტერიტორიიდან, რომელმაც დე-ფაქტო დამოუკიდებლობა 1992-93 წლის ომის შემდეგ გამოაცხადა. საქართველოს აფხაზეთთან ოფიციალური ურთიერთობა არ აქვს და თხილი არის ერთადერთი პროდუქტი, რისი გაყიდვის საშუალებასაც საქართველოში აფხაზეთის დე-ფაქტო ხელისუფლება ფერმერებს აძლევს", - აღნიშნულია Economist-ის სტატიაში.

2018 წლიდან, DCFTA-ხელშეკრულების თანახმად, ექსპორტზე გატანილი სასოფლო-სამეურნეო პროდუქტი ევროპის სტანდარტებს უნდა აკმაყოფილებდეს, ანუ წარმოების სერტიფიკატის ქონა არის საჭირო:

"თუ აფხაზეთი ქართულ სერტიფიკატს აიღებს, ეს ეროვნულ ღალატად აღიქმება. აქედან გამომდინარე, მათი თხილი ნუტელას შემადგენლობაში ვეღარ მოხვდება".

სტატიის ავტორები აღნიშნავენ, რომ ევროპისგან აფხაზეთის მოკვეთით ის უფრო მეტად იქნება რუსეთზე დამოკიდებული და ურთიერთობის დასტაბილურების ერთადერთი გზა ჟენევის მოლაპარაკებებია, თუმცა ეს გზა "არსად მიდის", რადგან მოლაპარაკებების დღის წესრიგში სავაჭრო საკითხები არ შედის.

ეკონომისტი ასევე აღნიშნავს, რომ აზიური ფაროსანას გავრცელებამ სერიოზული პრობლემები შეუქმნა თხილის წარმოებას აფხაზეთსა და საქართველოში. ამასთანავე, მხარეებს შორის არსებული დაპირისპირება პრობლემის ერთობლივად მოგვარებას უშლის ხელს.