საზმაუს ეთერში სიმღერის დროს წაქცეული10 წლის ბავშვის დედა თამარ აკობია "ტვ პირველთან" საუბრისას აცხადებს, რომ მომხდარის შესახებ სამართლებრივი ნაბიჯების გადადგმას არ აპირებდა, მაგრამ "იმდენად ვერ აცნობიერებენ რა მოხდა და შეტევაზე გადმოდიან, რომ ალბათ, დააპირებს". მისი თქმით, სიმღერის აკადემიასთან ყველანაირი კავშირი გაწყვიტა, რადგან მათ საფრთხედ აღიქვამს.

"ბავშვი, კარგად არის. თითები აქვს ნაღრძობი და ფიქსატორში გვაქვს ჩასმული. სხვა მხრივ კარგად არის, ფსიქოლოგიურ დახმარებას ვუწევთ, იმიტომ, რომ ბავშვს დახმარება სჭირდება, ნახა კიდევაც, როგორ წაიქცა, როგორ ვითარებაში მოხდა ყველაფერი.

ვუყურე ჩემი შვილის მკვლელობას — ასეთი რეაქცია მქონდა. წარმოიდგინეთ – უყურებ, როგორ არ ეხმარებიან შენს შვილს ისეთ დროს, როცა გადამწყვეტია წუთები და ყველაზე, ყველაზე მეტად სჭირდება დახმარება. რა თქმა უნდა, გავწყვიტე ურთიერთობა [სიმღერის აკადემიასთან], რა თქმა უნდა, გავწყვიტე. მე მათ არ ვენდობი და საფრთხედ აღვიქვამ ამ ადამიანებს. საფრთხედ. საშიშები არიან და მარტო ჩემი შვილისთვის კი არა, მოზარდებისთვის. იქ ვინც სწავლობს. მათ მარტო ჩემს შვილს კი არ მიაყენეს ზიანი, მიაყენეს იმ ბავშვებს, ვინც იქ არიან. იქ მყოფი ბავშვების ზოგიერთი მშობელი ამას ვერ აცნობიერებს. ანუ, პრობლემას ვერ ხედავს, რაშია. პრობლემას ხედავენ ჩემში, პრობლემას ხედავენ ვიდეოს გავრცელებაში და არა იმაში, რომ სინამდვილეში იქ ბავშვები რამ დააზიანა – დააზიანა უფროსების, მასწავლებლების უმოქმედობამ", — განაცხადა თამარ აკობიამ.

ჟურნალისტის კითხვაზე, სამართლებრივად ხომ არ აპირებს რაიმე ნაბიჯის გადადგმას? თამარ აკობიამ განაცხადა, რომ შესაძლოა "დააპიროს"

"არ ვაპირებდი, მაგრამ ცოტა ისე მიდის ახლა, იმდენად მოურიდებლები არიან, იმდენად ვერ აცნობიერებენ რა მოხდა, პირიქით – შეტევაზე გადმოდიან, ალბათ, დავაპირებ. ეს მათგან უკვე იმის საბაბია, რომ დავაპირო. ესე იგი, იმის მაგივრად, რომ სასწრაფო გამოეძახათ, ეს უფერული ბავშვი დასვეს ისევ იმისთვის, რომ თავიანთი დანაშაული დაეფარათ და ეთქვათ — ოჰ, კარგად არის, აი, ფოტოებს ვიღებთ და მშვენივრად არის ყველაფერი. ექიმი არ გამოიძახეს", — განაცხადა თამარ აკობიამ.