თურქეთის პოლიციამ, სტამბოლში ნარკოტიკებთან და პროსტიტუციასთან დაკავშირებული სავარაუდო დანაშაულების გამოძიების ფარგლებში, 22 ადამიანი დააკავა, მათ შორის შოუბიზნესის რამდენიმე ცნობილი სახეა. ინფორმაციას თურქული მედია ავრცელებს.

გავრცელებული ინფორმაციით, დაკავებულებს შორის არიან მომღერალი ქენან დოღულუ, მსახიობი ბერენ საათი, მუსიკოსი ოზან დოღულუ, მსახიობი ენის არიქანი, მომღერალი ბერდან მარდინი და სოციალური მედიის სახე ქერიმჯან დურმაზი.

ადგილობრივი მედიის ცნობით, ოპერაცია სტამბოლის პოლიციის დეპარტამენტის ნარკოტიკების წინააღმდეგ ბრძოლის ჯგუფებმა, მთავარი პროკურატურის მიერ წარმოებული გამოძიების ფარგლებში ჩაატარეს.

სამართალდამცავებმა 22 ეჭვმიტანილის დაკავების ორდერი გასცეს, რის შემდეგაც პოლიციამ ისინი დააკავა. ეს საქმე თურქეთის იმ ფართომასშტაბიანი ოპერაციების ნაწილია, რომელიც ნარკოტიკების წინააღმდეგ ბრძოლას ისახავს მიზნად.

დაკავების შემდეგ ეჭვმიტანილები სამედიცინო შემოწმებაზე წაიყვანეს, რაც თურქეთის სამართალდამცავ ორგანოებში სტანდარტულ პროცედურას წარმოადგენს.

მოგვიანებით ისინი სტამბოლის ქუჩუქჩექმეჯეს რაიონში მდებარე ნარკოტიკული დანაშაულის წინააღმდეგ ბრძოლის სამმართველოს შენობაში გადაიყვანეს, სადაც, სავარაუდოდ, გამოძიების ფარგლებში ჩვენებებს მისცემენ.

თითოეული პირის წინააღმდეგ არსებული კონკრეტული ბრალდებებისა თუ სასამართლო პროცესის მიმდინარე ეტაპის შესახებ დამატებითი დეტალები არ გავრცელებულა.