ეიფორიას მესამე სეზონის დასრულებასთან ერთად, სერიალსა და მის პერსონაჟებს ოფიციალურად ვემშვიდობებით. თუმცა, როგორც მისი გამორჩეული სცენები და ისტორიები, ისე მსახიობების შთამბეჭდავი შესრულებები დიდი ხნის განმავლობაში გვემახსოვრება.

ეიფორიას ქასთის ნაწილს სამსახიობო კარიერა ახალი დაწყებული აქვს, თუმცა ზოგიერთ მათგანს უკვე არაერთი ცნობილი როლი აქვს მორგებული სხვადასხვა ფილმსა თუ სერიალში.

აი, კიდევ სად გვინახავს ეიფორიას მსახიობები:

ზენდეია

ზენდეიას მიერ განსახიერებული რუ ბენეტი ეიფორიას ერთ-ერთი საუკეთესო ნაწილი იყო. იმის მტკიცება არაა საჭირო, თუ რამდენად ნიჭიერი მსახიობია ზენდეია. ამას არამხოლოდ რუს პერსონაჟი, არამედ ზენდეიას 2026 წლის კალენდარიც ადასტურებს — მსახიობი წელს 4 სხვადასხვა ფილმსა და 1 სერიალში მონაწილეობს.

საზოგადოების დიდი ნაწილი ზენდეიას შესრულებული მრავალი როლიდან ყველაზე კარგად ადამიანი ობობას ფრენჩაიზის MJ-ს იცნობს. თუმცა, არ უნდა დაგვავიწყდეს მისი კარიერის დასაწყისიც. ზენდეია 2010 წლის დისნეის სიტკომის, Shake It Up-ის, ერთ-ერთი მთავარი პერსონაჟი გახლდათ.

სიდნი სვინი

დიდი მნიშვნელობა არ აქვს, ქესის პერსონაჟზე რას ფიქრობთ. რამდენადაც უნდა გიყვარდეთ ან გაღიზიანებდეთ ის, ერთი რამ აშკარაა — სიდნი სვინიმ თავისი როლი შესანიშნავად შეასრულა. სწორედ ამიტომ, ეიფორიამ სიდნისთვის ჰოლივუდში უამრავი კარი გააღო.

თუმცა, ეიფორიამდე სვინი ყველაზე მეტად სერიალ მხევლის წიგნის მეორე სეზონში შესრულებული ედენის როლით იყო ცნობილი. ქესის მსგავსად, ედენიც საკმაოდ წინააღმდეგობრივი პერსონაჟია — თავიდან ბევრი მაყურებელი მის მიმართ უარყოფითად განეწყო, თუმცა დროთა განმავლობაში, სერიალში მისი ისტორიის განვითარებასთან ერთად, მაყურებელმა ნელ-ნელა პერსონაჟის მძიმე ხვედრის თანაგრძნობა ისწავლა.

ჯეიკობ ელორდი

საძულველ პერსონაჟებზე საუბრისას ჯეიკობ ელორდის მიერ განსახიერებული ნეით ჯეიკობსი არ უნდა დავივიწყოთ. ის ფაქტი, რომ სერიალის ყველა ფანს სძულს ნეითი, ბევრს მეტყველებს თავად ელორდის სამსახიობო შესრულებაზე. ჯეიკობის შესაძლებლობებიც არ დარჩენილა დაუფასებელი — მან ეიფორიას შემდეგ მრავალ წარმატებულ პროექტში მიიღო მონაწილეობა — 2026 წლის ერთ-ერთ ყველაზე გახმაურებულ ფილმში, Wuthering Heights-ში, მთავარ როლს სწორედ ჯეიკობი ასრულებდა.

თუმცა ეიფორიამდე ავსტრალიელი მსახიობი უკვე ცნობილი იყო ნოას როლით Netflix-ის სამნაწილიანი ფილმების სერიაში — The Kissing Booth.

ჰანტერ შაფერი

ჯულსის როლის შემსრულებელი ჰანტერ შაფერი სამსახიობო სფეროში სხვებთან შედარებით ახალი სახეა, შესაბამისად, მას არ ჰქონია იმის შესაძლებლობა, რომ მსოფლიოსთვის თავისი ნიჭი ისევე ფართოდ ეჩვენებინა, როგორც ეიფორიას სხვა მსახიობებს.

ამის მიუხედავად, ეიფორიაში გამოჩენის შემდეგ ჰანტერმა რამდენიმე საინტერესო პროექტში მიიღო მონაწილეობა: 2026 წლის ფილმში The Hunger Games: The Ballad of Songbirds & Snakes მან ტიგრისის როლი ითამაშა, 2024 წლის Cuckoo-ში მთავარი პერსონაჟის როლი შეასრულა, 2026 წელს კი ფილმ Mother Mary-ში ენ ჰეთეუეისთან ერთად მიიღო მონაწილეობა.

მოდ აპატოუ

მოდ აპატოუ ეიფორიაში ლექსის — ქესის უმცროსი დის როლს თამაშობს.აპატოუ მაყურებელმა გაიცნო ბავშვობისას შესრულებული როლებით მამამისის, ჯად აპატოუს ორ კომედიაში: Knocked Up და This Is 40. პირველ ფილმში მოდი სულ რაღაც 9 წლის ასაკში გადაიღეს და უცნაურად პირქუში ბავშვის პერსონაჟით მაყურებლის ყურადღებაც მიიპყრო.

ანგუს კლაუდი

ანგუს კლაუდი ეიფორიაში მაყურებლის ერთ-ერთი ყველაზე საყვარელი პერსონაჟის — ფესკოს როლს თამაშობდა. ჰანტერ შაფერის მსგავსად, ისიც სრულიად ახალი სახე იყო კინოინდუსტრიაში — სამსახიობო გამოცდილების არმქონე ანგუსი ბრუკლინის ქუჩაში სეირნობისას კასტინგის დირექტორმა შემთხვევით შეამჩნია.

მიუხედავად 2023 წელს ტრაგიკული და ნაადრევი გარდაცვალებისა, ანგუსმა მაინც მოასწრო რამდენიმე ფილმში მონაწილეობა, რომლებიც ეკრანებზე მისი გარდაცვალების შემდეგ გამოვიდა: 2024 წლის საშინელებათა ფილმში Abigail მან ერთ-ერთი გამტაცებლის როლი შეასრულა, ხოლო იმავე წლის დრამაში Your Lucky Day მთავარი პერსონაჟი განასახიერა. ანგუსის ძველი კადრები ეიფორიას ბოლო, მე-3 სეზონშიც გვხვდება.

ბარბი ფერეირა

ბარბი ფერეირა ეიფორიაში კეტ ჰერნანდესის როლში ვიხილეთ — პერსონაჟის, რომელიც საკუთარ კომპლექსებთან და თავდაჯერებულობასთან დაკავშირებულ პრობლემებთან გამკლავებას ცდილობს. აღსანიშნავია, რომ ეიფორიამდე ბარბი უკვე საკმაოდ ცნობილი იყო მოდის ინდუსტრიაში.

მიუხედავად იმისა, რომ ფერეირამ მე-2 სეზონის შემდეგ სერიალი დატოვა, სამსახიობო კარიერა წარმატებით გააგრძელა: 2022 წელს ის გამოჩნდა ჯორდან პილის გახმაურებულ ჰორორში Nope, ხოლო 2024 წელს მთავარი როლი შეასრულა საშინელებათა კომედიაში House of Spoils და ფსიქოლოგიურ თრილერში Bob Trevino Likes It.

ალექსა დემი

ზოგჯერ მანიპულატორი და მუდამ თავდაჯერებული მედი პერესის როლს ეიფორიაში ალექსა დემი შესანიშნავად თამაშობს.

ეიფორიამდე დემის რამდენიმე როლი ჰქონდა შესრულებული, თუმცა ყველაზე მეტად 2019 წლის ფილმ Waves-ით არის ცნობილი. აღსანიშნავია, რომ ალექსას ამჟამად დანარჩენი მსახიობების მსგავსად აქტიური სამსახიობო კარიერა არ აქვს.

ერიკ დეინი

ერიკ დეინი ეიფორიაში ყველაზე საძულველი პერსონაჟის — ნეით ჯეიკობსის — მამას თამაშობს, თუმცა, არც მისი პერსონაჟია ნეითზე უკეთესი.

დეინმა სახელი მრავალი წლის წინ გრეის ანატომიის პერსონაჟის, ექიმი მარკ სლოანის როლით გაითქვა. თავდაპირველად დერეკ შეფერდის მეტოქე პერსონაჟი დროთა განმავლობაში სამსახიობო ჯგუფის განუყრელ წევრად იქცა.

ადეუალე აკინუოიე-აგბაჯე

ეიფორიას მესამე სეზონს ალამოს როლში ადეუალე აკინუოიე-აგბაჯე შეუერთდა. ის სერიალის ფინალური სეზონის ერთ-ერთი მთავარი პერსონაჟია, თუმცა ადეუალე ჩვენ ეიფორიამდე ბევრად ადრე, Lost-დან გავიცანით. საკულტო სერიალში აგბაჯე მისტერ ეკოს როლს ასრულებდა. მანამდე მსახიობმა სახელი გაითქვა HBO-ს კიდევ ერთ ლეგენდარულ დრამაში — Oz.

სატელევიზიო როლების გარდა, ადეუალეს საკმაოდ წარმატებული კარიერა აქვს ფილმების მიმართულებითაც; ის მონაწილეობდა პროექტებში — The Mummy Returns, The Bourne Identity, Thor: The Dark World და DC-ის Suicide Squad.