ვინ არ წვევია ნიჭიერს, მაგრამ სახლის სახურავიდან პირდაპირი რეისით კარლსონი არცერთხელ არ ჩამოფრენილა. სწორედ ამიტომ 7 წლის ალექსი ნანავამ ქართველი მაყურებლის გაოცება გადაწყვიტა.

სცენამდე არც მურაბით მიუტყუებიათ და არც თაფლაკვერებს დაჰპირებიან, ფილარმონიაში საკუთარი სურვილით მობრძანდა, შოკოლადის და ცეკვის დიდი სიყვარულით. ეთერში გასვლისთანავე მაყურებლის დიდი სიყვარული დაიმსახურა.

ინტერნეტ მომხმარებლებმაც უკვე შერაცხეს ალექსი ქართველ კარლსონად.

მათი ნაწილი ლუი ანდერსონსაც კი ადარებს. ალექსანდრეც შეყვარებულია და სიყვარულში გამოტყდომის რცხვენია. არც მას უყვარს როცა სახეზე ჩქმეტენ, როგორც აღნიშნა უკვე მობეზრდა. თუმცა ლუის არც ალექსის მსგავსი პლასტიკა აქვს, არც მისი არტისტულობა და სიცოცხლის ხალისი.

ქართველი კარლსონი გამოტყდა, რომ ცეკვა შოკოლადებზე მეტად უყვარს და ეს დაამტკიცა კიდეც. 4 კი დაიმსახურა, რუსკა მაყაშვილიც ააცეკვა და სცენიდან გასულმა აღნიშნა, რომ ნიჭიერი ყველაზე მაგარი რამეა, რაც თავს გადახდენია და აწი რაც გადახდება იმაზე მაგარიც იქნება.

არ გეგონოთ, მხოლოდ ცეკვის სიყვარულით შემოიფარგლება, მომავალში პლასტიკურ ქირურგობას აპირებს. ვნახოთ, რას შემოგვთავაზებს მომდევნო ტურში ალექსი, მანამდე კი, ერთი რამ ცხადია, ჯესი ჯეი მისით იამაყებდა, ასე ოსტატურად მის მელოდიებზე არავის უცეკვია.