მთავრობის მეთაურმა, ირაკლი კობახიძემ ჟურნალისტებთან საუბრისას განაცხადა, რომ დასაქმებულთა რაოდენობის შემცირება "ფორმალურია" და "ვარდნა" სოციალური დახმარების ჩანაცვლების პროგრამის გაუქმებით არის გამოწვეული. კობახიძემ შემდეგ დასძინა, რომ სოციალური დახმარების ჩანაცვლების პროგრამაში მონაწილე 30 000 ადამიანი "ფიქტიურად დასაქმებული" იყო.

"ეს შემცირება არის მთლიანად ფორმალური და ამას აქვს ერთი კონკრეტული მიზეზი. მიზეზი არის ის, რომ არსებობდა სოციალური დახმარების ჩანაცვლების პროგრამა და 30 000 ადამიანი იყო რეალურად, შეიძლება ითქვას, ფიქტიურად დასაქმებული. სინამდვილეში ისინი ითვლებოდნენ დასაქმებულად, მაგრამ იღებდნენ სინამდვილეში ისევ სოციალურ დახმარებას. ასეთი იყო მდგომარეობა. ასეთი იყო დაახლოებით 30 000 ადამიანი, თუ არ ვცდები 29 000-ზე ოდნავ მეტი ადამიანი. ეს პროგრამა გაუქმდა, რაც აბსოლუტურად სწორი ნაბიჯი იყო, იმიტომ რომ ფიქტიური იყო და ამან გამოიწვია ფორმალურად, დაახლოებით 29 000-ით, დასაქმებულთა რაოდენობის შემცირება. რეალურად დასაქმებულთა რაოდენობა იზრდება. მხოლოდ ეს ერთი კონკრეტული ფაქტორი განაპირობებს ფორმალურ შემცირებას — გავაუქმეთ უსარგებლო პროგრამა და ამით ფორმალურად შემცირდა 29 000-ით დასაქმებულთა მაჩვენებელი. დანარჩენი, დასაქმება პირიქით გაზრდილია," — განაცხადა კობახიძემ.

ცნობისთვის, მთავრობის დადგენილებით, სოციალური დახმარების მიღების წესები იცვლება. ცვლილებების თანახმად, თუ 3 თვის განმავლობაში ოჯახის ერთ წევრზე შემოსავალი 1 250 ლარი ან მეტია, ოჯახი სოციალურად დაუცველის სტატუსს დაკარგავს. შესაბამისი დადგენილება 2026 წლის 7 მაისითაა დათარიღებული და მას ხელს ირაკლი კობახიძე აწერს ხელს.