რუსთავში ერთ-ერთი კომპანიის დირექტორს, დიდი ოდენობით თაღლითობის საქმეზე, ბრალდება წარედგინა. ინფორმაციას საქართველოს პროკურატურა ავრცელებს.

შსს-ს ინფორმაციით, ბრალდებული უცხო ქვეყნის მოქალაქეს დაჰპირდა, რომ საზღვარგარეთიდან საქართველოში 43 ავტომანქანას ჩამოიყვანდა და გადასცემდა. უწყების ცნობით, მან დაზარალებული დაარწმუნა, რომ ავტომობილების ჩამოსაყვანად საჭირო იყო თანხის ნაწილის წინასწარ გადახდა.

პროკურატურის განცხადებით, დაზარალებულმა ბრალდებულს როგორც ნაღდი ფულის სახით, ასევე მის მიერ მითითებულ საბანკო ანგარიშებსა და კრიპტო საფულეებზე ეტაპობრივად გადაურიცხა 1 004 798 ლარი. თუმცა, მიუხედავად თანხის მიღებისა, ბრალდებულს ავტომანქანები არ ჩამოუყვანია და თანხას თაღლითურად დაეუფლა.

"საქართველოს პროკურატურამ 1 004 798 ლარის თაღლითურად დაუფლების ფაქტზე ერთ პირს ბრალდება წარუდგინა.

საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ რუსთავში, ერთ-ერთი კომპანიის დირექტორი უცხო ქვეყნის მოქალაქეს დაჰპირდა, რომ საზღვარგარეთიდან საქართველოში, 43 ავტომანქანას ჩამოიყვნდა და გადასცემდა. ბრალდებულმა დაზარალებული მოატყუა, რომ თითქოსდა ავტომანქანების ჩამოსაყვანად საჭირო იყო ავტომანქანების ღირებულების ნაწილის წინასწარ გადახდა, რის შემდეგაც დაზარალებულმა ბარლდებულს ხელზე გადასცა და მის მიერ მითითებულ საბანკო და კრიპტო საფულის ანგარიშებზე გადარიცხა 1 004 798 ლარი. მიუხედავად თანხის გადახდისა, ბრალდებულმა ავტომანქანები არ ჩამოიყვნა და დაზარალებულის კუთვნილ დიდი ოდენობით თანხას დაეუფლა," — წერია განცხადებაში.

დაკავებულს ბრალდება საქართველოს სისხლის სამართლის კოდექსის 180-ე მუხლის მესამე ნაწილის "ბ" ქვეპუნქტით წარედგინა, რაც დიდი ოდენობით თაღლითობას გულისხმობს და 9 წლამდე თავისუფლების აღკვეთას ითვალისწინებს.