საქართველოს მე-5 პრეზიდენტმა, სალომე ზურაბიშვილმა საქართველოში ევროკავშირის ელჩს, პაველ ჰერჩინსკის დუშენის კუნთოვანი დისტროფიის (DMD) დიაგნოზის მქონე პაციენტების დახმარების თხოვნით მიმართა.

წერილში სალომე ზურაბიშვილი ევროკავშირის ელჩს დახმარებას სთხოვს DMD-ის დიაგნოზის მქონე პაციენტების დაფინანსების შესაძლებლობებისა და სხვა მხარდამჭერი მექანიზმების იდენტიფიცირებაში, რაც მათ დაეხმარება.

"იმ დროს, როდესაც ქართველი ხლხის მიმართ მხარდაჭერა სულ უფრო იზღუდება, თქვენი ჩართულობა მნიშვნელოვანი დახმარება იქნებოდა DMD-ით დაზარალებული პაციენტებისა და მათი ოჯახებისთვის და კიდევ ერთხელ დაადასტურებდა ევროკავშირის ერთგულებას საქართველოს ხალხის მხარდაჭერის მიმართ," — აღნიშნულია წერილში.

ზურაბიშვილმა 7 მაისს განაცხადა, რომ დიუშენის კუნთოვანი დისტროფიით დაავადებული ბავშვების დახმარების თხოვნით ევროკავშირის ჯანდაცვის კომისარს და ამერიკის ელჩის მოვალეობის შემსრულებელსაც მიმართავს.

შეგახსენებთ, რომ დიუშენის კუნთოვანი დისტროფიით დაავადებული ბავშვების მშობლებმა კანცელარიასთან მე-20 ღამე გაათენეს. მშობლების მთავარი მოთხოვნაა, სახელმწიფომ ქვეყანაში შემოიტანოს მედიკამენტები, რომლებიც დაავადების პროგრესირებას შეაჩერებს. მშობლები ასევე უკვე მე-20 დღეა ირაკლი კობახიძესთან შეხვედრას უშედეგოდ ითხოვენ.