სომხეთის პრემიერმინისტრმა ნიკოლ ფაშინიანმა ერევანში ევროპული პოლიტიკური გაერთიანების (EPC) სამიტის ფარგლებში განაცხადა, რომ იმედოვნებს, რომ 2028 წელს აზერბაიჯანში EPC-ის მე-10 სამიტს დაესწროს. ინფორმაციას რუსული მედია ავრცელებს.

"იმედი მაქვს, რომ 2028 წელს მექნება შესაძლებლობა, ვეწვიო აზერბაიჯანს EPC-ის მე-10 სამიტზე", — განაცხადა ფაშინიანმა.

მისი თქმით, ერევანმა და ბაქომ მხარი დაუჭირდნენ ერთმანეთს ღონისძიების ორგანიზებაში. სომხეთის პრემიერმინისტრმა ასევე აღნიშნა, რომ EPC-ის ფორმატმა საკვანძო როლი ითამაშა ორ ქვეყენას შორის მშვიდობის დამყარების პროცესში.

აზერბაიჯანის პრეზიდენტმა ილჰამ ალიევმა მიმდინარე წლის 20 იანვარს განაცხადა, რომ ბაქოსა და ერევანს შორის ურთიერთობები უკვე თანამშრომლობაში გადადის. მან აღნიშნა, რომ ბაქომ დაიწყო სომხეთისთვის კრიტიკული საქონლის, უპირველეს ყოვლისა კი ნავთობპროდუქტების მიწოდება, რაზეც ქვეყანა დიდწილად არის დამოკიდებული. ალიევმა ამ ვითარებას ორმხრივად მომგებიანი უწოდა.

ცნობისთვის, EPC-ის ფორუმს ესწრებიან ლიდერები ევროკავშირის 27 წევრი სახელმწიფოდან, აგრეთვე ალბანეთიდან, ანდორიდან, სომხეთიდან, აზერბაიჯანიდან, ბოსნია და ჰერცეგოვინიდან, კანადიდან, საქართველოდან, ისლანდიიდან, კოსოვოდან, ლიხტენშტაინიდან, მოლდოვიდან, მონაკოდან, მონტენეგროდან, ჩრდილოეთ მაკედონიიდან, ნორვეგიიდან, სან-მარინოდან, სერბეთიდან, შვეიცარიიდან, თურქეთიდან, უკრაინიდან და გაერთიანებული სამეფოდან.

შეგახსენებთ, ევროპული პოლიტიკური გაერთიანება (EPC) არის სამთავრობოთაშორისო ფორუმი ევროპის მომავლის შესახებ პოლიტიკური და სტრატეგიული დისკუსიებისთვის, რომელიც 2022 წელს, უკრაინაში რუსეთის სრულმასშტაბიანი შეჭრის შემდეგ დაარსდა.