"ვისოლ ჯგუფის" დამფუძნებელი, სოსო ფხაკაძე, რომელიც თბილისში Trump Tower-ის პროექტის ერთ-ერთი პარტნიორია, მიიჩნევს, რომ ეს წამოწყება ქვეყნის პოზიციონირებას პრემიუმ კლასის უძრავი ქონების მსოფლიო რუკაზე მნიშვნელოვნად გააუმჯობესებს. ამის შესახებ ის Linkedin-ის პირად გვერდზე გამოქვეყნებულ პოსტში წერს.

მისი განმარტებით, Trump Tower Tbilisi-ს გამოჩენა გლობალურ ბაზარზე საქართველოს ცნობადობის გაზრდას უწყობს ხელს და ქვეყანას უძრავი ქონების მაღალი სეგმენტის ინვესტორებისთვის კიდევ უფრო მიმზიდველს გახდის.

"Trump Tower Tbilisi ჩვენთვის ბევრად უფრო მეტია, ვიდრე ცალკე აღებული დეველოპერული პროექტი — ეს არის დადასტურება იმისა, რომ ქართულ ხედვას, პროფესიონალიზმსა და ქართულ შრომას შეუძლია დადგეს მსოფლიოს უდიდეს ბრენდებთან ერთ რიგში.

ჩვენს პარტნიორთან, "არქისთან" ერთად გვჯერა, რომ თბილისი იმსახურებს იმავე ხარისხის არქიტექტურასა და ცხოვრების სტანდარტს, რასაც ნიუ-იორკი, მაიამი თუ დუბაი სთავაზობენ საკუთარ მოქალაქეებსა და სტუმრებს — და ეს პროექტი სწორედ ამ რწმენის მატერიალიზებაა.

პროექტის განხორციელებაში ასევე მონაწილეობენ: The Sapir Organization-ი, BLOX Group-ი და Finvest Georgia.

პროექტის არქიტექტორია Gensler-ი, ამერიკის შეერთებული შტატების წამყვანი არქიტექტურული კომპანია. The Trump Organization-ის გლობალური სტანდარტებისა და Gensler-ის პროფესიონალიზმის შერწყმით შექმნილი პროექტი აუცილებლად გახდება ჩვენი დედაქალაქის ახალი არქიტექტურული ღირსშესანიშნაობა და დააწესებს სრულიად ახალ ხარისხობრივ სტანდარტს.

პროექტის ეკონომიკური ეფექტი მრავალმხრივია: მასშტაბური პროექტის ირგვლივ უცხოური კაპიტალის მოზიდვა, ახალი სამუშაო ადგილების შექმნა სამშენებლო და ოპერაციულ ფაზებზე, საერთაშორისო ბაზრებიდან უძრავი ქონების შესყიდვის მსურველთა ინტერესის ზრდა და ქართული დეველოპერული ინდუსტრიის შემდგომი განვითარება. აღნიშნული პროექტი არის სტრატეგიული ეტაპი და იგი ხელს შეუწყობს ჩვენი ქვეყნის ცნობადობის ამაღლებას პრემიუმ უძრავი ქონების გლობალურ ბაზარზე", — დაწერა სოსო ფხაკაძემ.

შეგახსენებთ, The Trump Organization-ის ცნობით, მათთან თანამშრომლობით, კომპანიები Biograpi Living, Archi, The Sapir Organization, Blox და Finvest Georgia პროექტ Trump Tower Tbilisi-ს მშენებლობას აანონსებენ.

როგორც ტრამპის ორგანიზაცია წერს, შენობის დიზაინზე მსოფლიოს უმსხვილესმა არქიტექტურულმა ფირმა Gensler-მა იმუშავა. მათივე ინფორმაციით, დაგეგმილია, რომ ცათამბჯენი დაახლოებით 70-სართულიანი უნდა იყოს, რითაც ის საქართველოში ყველაზე მაღალი ნაგებობა გახდება.