ევროპელი სოციალისტების წევრი, ლადო ბოჟაძე საპარლამენტო პლენარულ სხდომაზე სახელმწიფო ფარმაცევტული ქარხნის შექმნის ინიციატივით გამოვიდა.

როგორც მან განაცხადა, სურს დააყენოს სახელმწიფო ფარმაცევტული საწარმოს შექმნის საკითხი, რომლის მიზანიც მედიკამენტებზე ფასების შემცირება იქნება. ბოჟაძის თქმით, მიუხედავად იმისა, რომ მთავრობა და პარლამენტი აქტიურად მუშაობენ ფასების რეგულირებაზე და უკვე ათასობით წამალი იყიდება რეფერენტული ფასებით, მედიკამენტების ღირებულება კვლავ ერთ-ერთ მთავარ პრობლემად რჩება მოქალაქეებისთვის.

დეპუტატის შეფასებით, გარე ეკონომიკური ფაქტორები — მათ შორის ელექტროენერგიის ტარიფების ზრდა და საწვავის გაძვირება ახლო აღმოსავლეთში — შესაძლოა დამატებით აისახოს როგორც სურსათის, ისე მედიკამენტების ფასებზე.

"მნიშვნელოვანია, რომ ის გეგმაზომიერი პროგრესი და შედეგები, რომელიც ჩვენ ნამდვილად გვაქვს, რეალურად ხელშესახები გახდეს საქართველოს ყველა მოქალაქისთვის. ამიტომ, გვინდა ამ ტრიბუნიდან კიდევ ერთხელ დავაყენოთ სახელმწიფო ფარმაცევტული ქარხნის შექმნის საკითხი.

მიუხედავად იმისა, რომ მთავრობაც და პარლამენტიც აქტიურად მუშაობთ ფასების დასარეგულირებლად და ათასობით წამალი უკვე რეფერენტული ფასებით იყიდება, ჩვენი მოქალაქეებისთვის ყველაზე პრობლემური მაინც მედიკამენტების ღირებულებაა. ის ფაქტი, რომ გაიზარდა ელექტროენერგიის გადასახადი და იზრდება საწვავის ფასი, ახლო აღმოსავლეთში მიმდინარე მოვლენების გამო, სავარაუდოდ, სურსათისა და მედიკამენტების კიდევ უფრო გაძვირებას გამოიწვევ", — აღნიშნა მან.

ბოჟაძის განმარტებით, კერძო სექტორი მილიონობით ლარს ხარჯავს კვლევებში, თუმცა სახელმწიფო საწარმო სხვა მოდელით იმუშავებს.

"სახელმწიფო ქარხანას ბუნებრივია, თანხების დახარჯვა არ დასჭირდება და გამოუშვებს მხოლოდ იმ მედიკამენტებს, რომლებიც ისედაც იქნება უკვე ლიცენზირებული, აპრობირებული მთელს მსოფლიოში", — განაცხადა ბოჟაძემ.

მისივე თქმით, ინიციატივა არ გულისხმობს სახელმწიფო აფთიაქების შექმნას.

"ყველა სააფთიაქო ქსელში იქნება დახლი, სადაც გაიყიდება სახელმწიფოს მიერ გამოშვებული, ლიცენზირებული მედიკამენტები და გაიყიდება მინიმალურ ფასად, რადგან სახელმწიფოს საწარმო არ და ვერ იქნება ორიენტირებული მოგებაზე", — განაცხადა ბოჟაძემ სხდომაზე.