სამართალდამცველებმა "ქურდულ სამყაროსთან" კავშირში მყოფი 44 პირი დააკავეს, კიდევ 6 პირს ბრალი დაუსწრებლად წარედგინება, მათ შორის ერთი, საზღვარგარეთ მყოფი ე.წ. კანონიერი ქურდია, — ამის შესახებ შინაგან საქმეთა მინისტრის მოადგილემ, ალექსანდრე დარახველიძემ განაცხადა. მისივე განმარტებით, ბრალდებულები ქურდულ გარჩევებს" აწყობდნენ და გამოჰქონდათ ე.წ. "ქურდული გადაწყვეტილებები".

დარახველიძის თქმით, ბრალდებულები კავშირში იყვნენ საზღვარგარეთ მყოფ ე.წ. "კანონიერ ქურდთან", მამუკა შუბითიძესთან. ისინი ფინანსური დავების გადასაჭრელად მოქალაქეებს თანხის გადახდას სთხოვდნენ, ვადების დარღვევის შემთხვევაში კი ფიზიკური ანგარიშსწორებითა და სიცოცხლის მოსპობით ემუქრებოდნენ. ასევე, აგროვებდნენ ინფორმაციას თბილისსა და კახეთში მცხოვრებ პირებზე ფულის გამოძალვის მიზნით.

ნიკვთმტკიცების სახით ამოღებულია ცეცხლსასროლი იარაღი, საბრძოლო მასალა, ავტომანქანა და ტექნიკა (ტელეფონები, კომპიუტერები), რომლითაც კრიმინალური კავშირები მყარდებოდა.
დაკავებულებს 15 წლამდე ვადით თავისუფლების აღკვეთა ემუქრებათ.

"გასული დღე-ღამის განმავლობაში, სამართალდამცავების მიერ, ქვეყნის მასშტაბით ჩატარებული მორიგი წარმატებული საპოლიციო ღონისძიების შედეგად, მოსამართლის განჩინების საფუძველზე, "ქურდულ სამყაროსთან" კავშირში მყოფი 44 პირია დაკავებული. კიდევ 6 პირს ბრალი დაუსწრებლად წარედგინება, მათ შორის ერთი, საზღვარგარეთ მყოფი ე.წ. კანონიერი ქურდია.

სამართალდამცავების მიერ, ინტენსიურ რეჟიმში ჩატარებული ფარული საგამოძიებო მოქმედებების შედეგად დადგინდა, რომ სისხლის სამართლის დანაშაულში ბრალდებული პირები აწყობდნენ ე.წ. "ქურდულ გარჩევებს" და გამოჰქონდათ ე.წ. "ქურდული გადაწყვეტილებები".

დაკავებულები უკავშირდებოდნენ ქურდული სამყაროს წარმომადგენლებს, მათ შორის ე.წ. "კანონიერ ქურდს" მამუკა შუბითიძეს, რომელიც პირადი სარგებლის მიღების მიზნით, ე.წ. "ქურდული წესების" შესაბამისად, მოქალაქეებს შორის არსებული ფინანსური და სხვა კრიმინალური სახის დავებზე იღებდა გადაწყვეტილებებს, რის შემდეგაც მხარეებს თანხის გადახდას აკისრებდა. კონკრეტული ვადების დარღვევის შემთხვევაში კი, ფიზიკური ანგარიშსწორებითა და სიცოცხლის მოსპობით ემუქრებოდა.

გამოძიებით ასევე დგინდება, რომ ბრალდებულები ე.წ. კანონიერ ქურდს პერიოდულად აწვდიდნენ ინფორმაციას თბილისსა და კახეთის რეგიონში მცხოვრები იმ პირების შესახებ, რომლებისგანაც შემდგომში შესაძლებელი იქნებოდა, "ქურდული სამყაროს" სახელით, მატერიალური სარგებლის მიღება და ფულის გამოძალვა.

ჩატარებული ოპერატიული ღონისძიებების შედეგად, ნივთმტკიცებად ამოღებულია ავტომანქანა, ცეცხლსასროლი იარაღები და საბრძოლო მასალა, ასევე ბრალდებულების მობილური ტელეფონები და კომპიუტერული ტექნიკა, რომელთა საშუალებითაც ისინი ერთმანეთს და უცხოეთში მცხოვრებ ქართველ ე.წ. "კანონიერ ქურდს" უკავშირდებოდნენ.

გამოძიება საქართველოს სისხლის სამართლის კოდექსის 181-ე, 223-ე პრიმა, 223-ე ტერცია და 223-ე კვარტა მუხლებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს", — განაცხადა შინაგან საქმეთა მინისტრის მოადგილემ, ალექსანდრე დარახველიძემ უწყებაში გამართულ ბრიფინგზე.