"ბრალდებები, თითქოს ცხოველებს ცოცხლად წვავენ, მიუღებელია და ასეთი ბრალდებები აუცილებლად უნდა დაადასტურონ იმ პირებმა, ვინც ამას ამტკიცებს", — ამის შესახებ გარემოს დაცვისა და სოფლის მეურნეობის მინისტრის მოადგილემ, ლაშა ავალიანმა განაცხადა.

მისი განმარტებით, გორში, მიუსაფარი შინაური ცხოველების მართვის შიდა ქართლის ინტერმუნიციპალური სააგენტოს თავშესაფრის ტერიტორიაზე სურსათის ეროვნული სააგენტოს მიერ მიუსაფარი ძაღლების გადაყვანასთან დაკავშირებით, რეალობას არ შეესაბამება.

"ზოგიერთ ვიდეოში მტკიცებით ფორმაში იყო ნათქვამი ის, რაც რეალობას არ შეესაბამება. შინაურ ბინადარ ცხოველებთან მიმართებაში ღონისძიებები მიმდინარეობდა კახეთსა და იმერეთში; ასევე გამოიყო ჯგუფი, რომელმაც სამეგრელო-ზემო სვანეთის ტერიტორიაზე დაიწყო ოპერირება და პირველი გასვლა ადგილობრივ მერიასთან ერთად განხორციელდა მხოლოდ ზუგდიდის მუნიციპალიტეტში. ხაზგასმით მინდა აღვნიშნო, რომ სურსათის ეროვნული სააგენტო არც ერთ სხვა რეგიონში და მუნიციპალიტეტში არ შესულა და არც ერთ სხვა თავშესაფარში ცხოველები არ მიუყვანია.

ვინც ამტკიცებს, რომ ასეთი ფაქტი მოხდა და არსებობს კადრები, ვთხოვ, გაასაჯაროონ. ეს ძალიან ადვილი დასამტკიცებელია და აუცილებლად უნდა დაინტერესდნენ შესაბამისი ორგანოები. ბრალდებები, თითქოს ცხოველებს ცოცხლად წვავენ, მიუღებელია და ასეთი ბრალდებები აუცილებლად უნდა დაადასტურონ იმ პირებმა, ვინც ამას ამტკიცებს. შესაბამისი ორგანოებიც უნდა დაინტერესდნენ, რატომ გავრცელდა ეს ინფორმაცია მტკიცებითი ფორმით. დღეის მდგომარეობით, სურსათის ეროვნულ სააგენტოს არანაირი შეხება არ აქვს შიდა ქართლის თავშესაფართან. ერთადერთი, რაც მე ვნახე, არის ბოლი ინსენერატორიდან, რომლის ფუნქციაა ნარჩენების, მათ შორის ცხოველური ნარჩენების დაწვა, რომელიც ოპერაციის შემდეგ წარმოიქმნება", — აღნიშნა მინისტრის მოადგილემ.

ცნობისათვის, 1-ელ აპრილს სოციალურ ქსელში გავრცელდა ვიდეო, სადაც მოქალაქე ამბობს, რომ გორის მიუსაფარი ცხოველების თავშესაფრის ტერიტორიაზე ცხოველებს წვავდნენ. სურსათის ეროვნულმა სააგენტომ გავრცელებულ ინფორმაციას ტყუილი უწოდა.

გუშინ კი აქტივისტებმა ზუგდიდის თხილის ქარხნის მიმდებარე ტერიტორიიდან, ქუთაისის ცხოველთა თავშესაფრიდან გაშვებული, მიუსაფარი ძაღლების ნაწილი ქალაქში დააბრუნეს. ამის შესახებ NEWS.On.ge-ს ცხოველთა უფლებადამცველმა, ლიკა აკობიამ განუცხადა.

მისი თქმით, აქტივისტები მიუსაფარი ძაღლების წამოსაყვანად ჯერ ქუთაისის ცხოველთა თავშესაფარში მივიდნენ, მაგრამ თავშესაფრის ადმინისტრაციისგან უარი მიიღეს. მოგვიანებით გაირკვა, რომ თავშესაფრის ადმინისტრაცია ცხოველების დატოვებას ზუგდიდის თხილის ქარხნის მიმდებარე ტერიტორიაზე გეგმავდა. ლიკას თქმით, 65 ძაღლიდან, მათ 28-ის წამოყვანა შეძლეს, რის შემდეგაც ცხოველები ქუთაისში დააბრუნეს. დანარჩენი 37 მიუსაფარი ძაღლი კვლავ ქუთაისის თავშესაფარში რჩება.

"ზუგდიდში თხილის ქარხანასთან დატოვეს ძაღლები. დაახლოებით წაყვანილი ჰყავთ 65 ძაღლი, აქედან 28 ძაღლი ჩვენ დავაბრუნეთ და უკვე წავიყვანეთ ქალაქის ლოკაციებზე, სადაც ხალხს ჰყავს მიკედლებული, დანარჩენები ქუთაისის თავშესაფარში არიან. დანარჩენი ძაღლებიც უნდა წამოვიყვანოთ. მივალთ თავშესაფარში, მივიყვანთ მანქანებს, წამოვიყვანთ ძაღლებს და დავაბრუნებთ ქალაქში", — ამბობს ლიკა აკობია NEWS.On.ge-სთან სატელეფონო საუბარში.