დღეს, 22 ივნისს, პროკურორმა ნინო აღლემაშვილმა ბრიფინგი გამართა, სადაც განაცხადა, რომ პროკურატურამ ეროსი კიწმარიშვილის გარდაცვალების ფაქტზე მიმდინარე გამოძიება დაასრულა.

პროკურატურის თქმით, გამოძიებამ დაადგინა, რომ ეროსი კიწმარიშვილი მიზანმიმართულად თვითმკვლელობამდე არავის არ მიუყვანია და არავის არ მოუკლავს:

"მან თავი მოიკლა, რადგან კონკრეტული გარემოებების არსებობის მხედველობაში მიღებით შეუძლებელია მკვლელობა იყოს ჩადენილი რომელიმე სხვა პირის მიერ. შესაბამისად მიღებულია გადაწყვეტილება სისხლის სამართლის საქმეზე გამოძიების შეწყვეტის შესახებ" - განაცხადა ნინო აღლემაშვილმა.

პროკურორის თქმით, ავტოფარეხში, ეროსი კიწმარიშვილის გარდაცვალების დღეს 17 საათიან შუალედში შესული მანქანებიდან და პირებიდან მის სიკვდილთან კავშირი არავის აქვს:

"გამოძიების მსვლელობისას ასევე გაიშიფრა ყველა ვიდეოკამერა, რომელსაც დაფიქსირებული ჰქონდა საქმისათვის მნიშვნელობის მქონე ინფორმაცია. მათ შორის ავტოფარეხის შესასვლელის მიმართულებით განთავსებული ვიდეოკამერების ჩანაწერები, რომელთა მიხედვით გარდაცვალების დღეს 17:00 საათამდე დროის შუალედში ავტოფარეხში შევიდა 10 ავტომანქანა და ორი ფეხით მოსიარულე პირი. ყველა მათგანი დადგენილია და დაკითხულია გამოძიების პროცესში. ესენი არიან: კიწმარიშვილის მეზობლები და მათი მომსახურე პერსონალი, რომლებსაც მის გარდაცვალებასთან რაიმე კავშირი არ აქვთ".

პროკურატურამ გამოაქვეყნა ვიდეო, რომელიც აღლემაშვილის განცხადებით, საქმის მსვლელობის დროს მოპოვებული მტკიცებულებების საფუძველზე შეიქმნა და მასში "დეტალურადაა გადმოცემული ეროსი კიწმარიშვილის გარდაცვალების ამსახველი ფაქტები".

ეროსი კიწმარიშვილი 2014 წლის 15 ივლისს თავისი ბინის ქვემოთ არსებულ ავტოფარეხში გარდაცვლილი იპოვეს. პროკურატურამ გამოძება იმავე დღეს საქართველოს სისხლის სამართლის კოდექსის 115-ე მუხლით დაიწყო, რომელიც თვითმკვლელობამდე მიყვანას გულისხმობს.