2 წლის შემდეგ გასაჯაროვდა პოლიციის ჩანაწერები, რომლებშიც ასახულია ჯასტინ ტიმბერლეიკის დაკავება ნასვამ მდგომარეობაში ავტომობილის მართვის გამო.

ტიმბერლეიკი 2024 წლის ივნისში დააკავეს, მას შემდეგ, რაც პოლიციამ საგზაო ნიშნის უგულებელყოფისა და გზის არასწორ მხარეს გადასვლის გამო გააჩერა.

კადრებში ჩანს, როგორ ბორძიკებს ჯასტინი სიმთვრალის შესამოწმებელი ტესტების დროს და ცდილობს განმარტოს, რომ ის მსოფლიო ტურნეზე იმყოფება.

დაკავების დროს 45 წლის მომღერალი საგ ჰარბორში, ჰემპტონის მდიდრულ სოფელში იმყოფებოდა, რომელსაც ცნობილი ადამიანები ხშირად სტუმრობენ.

ტიმბერლეიკმა ინციდენტის შემდეგ სოფლის წინააღმდეგ სარჩელი შეიტანა და მოითხოვდა, რომ მისი დაკავების კადრები არ გაესაჯაროებინათ, რადგან მათში მომღერალი მოწყვლად მდგომარეობაში იმყოფებოდა და ვიდეოების გავრცელება მის რეპუტაციას გამოუსწორებელ ზიანს მიაყენებდა.

თუმცა, მოსამართლემ დაადგინა, რომ კადრების გასაჯაროება არ წარმოადგენდა პირადი ცხოვრების ხელყოფას და ორივე მხარე შეთანხმდა მათ გამოქვეყნებაზე (გარკვეული დეტალების დაფარვით).

გასაჯაროვდა 8 საათზე მეტი ხანგრძლივობის მასალა, რომელიც ასახავს როგორც მომღერლის ავტომობილის გაჩერების მომენტს, ისე პოლიციის განყოფილებაში გადაყვანის შემდგომ კადრებს.

იხილეთ ვიდეო:

ვიდეოში პოლიციის ოფიცერი ტიმბერლეიკს მძღოლის ფანჯრიდან ესაუბრება და ეუბნება, რომ დაინახა, როგორ გადავიდა მისი ავტომობილი გზის მარცხენა მხარეს და როგორ არ დაემორჩილა გაჩერების ნიშნებს.

"დიახ, ამის გამო ბოდიშს ვიხდი," — პასუხობს ტიმბერლეიკი და ამბობს, რომ ავტომობილი ნაქირავები აქვს. როდესაც ოფიცერმა ჰკითხა, სტუმრად იყო თუ არა, ტიმბერლეიკმა აუხსნა, რომ ტურნეზე იმყოფებოდა.

რაზე? — კითხულობს პოლიციელი.

— მსოფლიო ტურნეზე — პასუხობს მომღერალი.

რას აკეთებთ? — აგრძელებს ოფიცერი.

— ამ... რთული ასახსნელია. ამ... მსოფლიო ტურნე. მე ჯასტინ ტიმბერლეიკი ვარ...

რა გქვიათ? — კითხულობს ოფიცერი.

ტიმბერლეიკი თავის სახელს იმეორებს, რის შემდეგაც პოლიციელი მართვის მოწმობას სთხოვს.

ოფიცრებმა ბრალდების დოკუმენტში აღნიშნეს, რომ გაჩერებისას ტიმბერლეიკს ამღვრეული თვალები ჰქონდა, პირიდან კი ალკოჰოლური სასმლის ძლიერი სუნი ამოსდიოდა.

კადრებში ასევე ჩანს, რომ ტიმბერლეიკს სიფხიზლის დასადგენ ტესტებს უტარებენ, როგორებიცაა სწორ ხაზზე სიარული და ოფიცრის ხელის მოძრაობაზე მზერის მიდევნება.

ჯასტინმა ალკოტესტზე უარი თქვა და სიარულისას რამდენჯერმე წაბორძიკდა. მომღერალმა პოლიციელებს უთხრა, რომ ცოტას ნერვიულობდა.

საბოლოოდ, ოფიცრებმა მას ხელბორკილები დაადეს და პოლიციის ავტომობილის უკანა სავარძელზე მოათავსეს. ვიდეოში ჩანს ტიმბერლეიკთან ერთად მყოფი პირიც, რომელიც პოლიციელებს უახლოვდება და სთხოვს, რომ ჯასტინი არ დააკავონ.

სასამართლომ ტიმბერლეიკს $500-ის ოდენობით ჯარიმა, $260 დანამატის გადახდა და 25-საათიანი საზოგადოებრივი შრომა დააკისრა. ასევე, მას დაევალა საგზაო უსაფრთხოების შესახებ საჯარო განცხადების გაკეთება.

"მაშინაც კი, თუ მხოლოდ ერთი ჭიქა სასმელი გაქვთ მიღებული, ნუ მიუჯდებით საჭეს," — თქვა მომღერალმა განცხადებაში. "მე ეს შეცდომა დავუშვი, მაგრამ იმედი მაქვს, ვინც ახლა მიყურებს და მისმენს, ჩემს მაგალითზე ჭკუას ისწავლის. მე ნამდვილად ვისწავლე."

იხილეთ უფრო ხანგრძლივი ვიდეო: