ილია რემესლომ, კრემლის მომხრე ბლოგერმა, რომელმაც სოციალურ ქსელში გამოქვეყნებულ პოსტში მოულოდნელად რუსეთის პრეზიდენტი ვლადიმერ პუტინი და უკრაინაში მიმდინარე ომი დაგმო, ფსიქიატრიულ დაწესებულებაში მოათავსეს. ინფორმაციას Reuters ავრცელებს.

ილია რემესლომ კარიერა პუტინის კრიტიკოსების მხილებით ააწყო, სანამ თავად არ გახდა ერთ-ერთი მათგანი. სამშაბათს გვიან ღამით მან Telegram-ზე თავის 90 000 გამომწერს გაუზიარა მანიფესტი სათაურით: "ხუთი მიზეზი, რის გამოც შევწყვიტე ვლადიმერ პუტინის მხარდაჭერა".

მან განაცხადა, რომ პუტინმა "წამგებიანი ომი" წამოიწყო უკრაინაში, რომელმაც მილიონობით ადამიანი იმსხვერპლა და რუსეთის ეკონომიკა მისი მოქალაქეების კეთილდღეობის საზიანოდ გაანადგურა.

"ვლადიმერ პუტინი არ არის ლეგიტიმური პრეზიდენტი. ვლადიმერ პუტინი უნდა გადადგეს და წარსდგეს სასამართლოს წინაშე, როგორც ომის დამნაშავე და ქურდი", — დაწერა რემესლომ თავის პოსტში.

მოგვიანებით, სანქტ-პეტერბურგის გაზეთმა "ფონტანკამ" გაავრცელა ინფორმაცია, რომ რემესლო ქალაქის №3 ფსიქიატრიულ საავადმყოფოში გადაიყვანეს. Reuters-მა ვერ შეძლო პირადად რემესლოსთან დაკავშირება ან იმის დადგენა, თუ როგორ მოხვდა იგი საავადმყოფოში.

ქალბატონმა, რომელმაც საავადმყოფოს ტელეფონს უპასუხა, Reuters-ს დაუდასტურა, რომ რემესლოს სახელის, მამის სახელისა და გვარის მქონე მამაკაცი მართლაც მიიღეს დაწესებულებაში. საავადმყოფოს თანამშრომელმა, რომელმაც ვინაობა არ გაამჟღავნა, აღნიშნა, რომ არ ფლობდა ინფორმაციას იმის შესახებ, თუ როდის და რა საფუძვლით გადაიყვანეს ბლოგერი საავადმყოფოში.

ცნობისთვის, რემესლო, 42 წლის იურისტი და კრემლის მიერ კონტროლირებადი სათათბირო ორგანოს ყოფილი წევრი, წარსულში სასტიკად აკრიტიკებდა გარდაცვლილ ოპოზიციონერს, ალექსეი ნავალნის — პუტინის ყველაზე თვალსაჩინო კრიტიკოსს, რომელიც 2024 წლის თებერვალში არქტიკის სასჯელაღსრულების კოლონიაში გარდაიცვალა.