სრულიად საქართველოს კათალიკოს-პატრიარქის, ილია მეორის გარდაცვალების გამო მწუხარებას გამოთქვამს აშშ-ის სახელმწიფო მდივანი მარკო რუბიო და ქართველ ხალხს და მართლმადიდებლურ ეკლესიას თანაგრძნობას უცხადებს. სამძიმრის წერილს აშშ-ის სახელმწიფო დეპარტამენტი აქვეყნებს.

"ვწუხვართ მისი უწმინდესობის, საქართველოს კათოლიკოს-პატრიარქის, ილია II-ის გარდაცვალების გამო და გულწრფელ სამძიმარს ვუცხადებთ საქართველოს მოსახლეობას, ასევე საქართველოს მართლმადიდებელი ეკლესიის ყველა მორწმუნეს. მისი სულიერი ლიდერობა და ურყევი მემკვიდრეობა თაობებს დაამახსოვრდებათ. განისვენოს მშვიდად", — წერია აშშ-ის სახელმწიფო დეპარტამენტის მიერ გავრცელებულ სამძიმრის წერილში.

მიმდინარე წლის 17 მარტს, 93 წლის ასაკში სრულიად საქართველოს კათოლიკოს-პატრიარქი ილია II გარდაიცვალა. 17 მარტის დილას, ილია II-ის ჯანმრთელობის მდგომარეობა გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს და ჯანმრთელობის კრიტიკული მდგომარეობის გამო მართვით სუნთქვაზე იმყოფებოდა.

18 მარტს, კათალიკოს-პატრიარქი საპატრიარქოდან სამების საკათედრო ტაძარში გადაასვენეს, სადაც სახალხო პანაშვიდები იმართება. სინოდის გადაწყვეტილებით, ილია II-ს 22 მარტს სიონის საკათედრო ტაძარში დაკრძალავენ.

სრულიად საქართველოს კათოლიკოს-პატრიარქის, ილია II-ის გარდაცვალების გამო საქართველოში გლოვა გამოცხადდა. გლოვის დღეები 22 მარტის ჩათვლით გაგრძელდება.