ილჰამ ალიევმა, ილია II-ის გარდაცვალების გამო, ირაკლი კობახიძეს სამძიმარი გამოუცხადა. ინფორმაციას აზერბაიჯანული მედია ავრცელებს.

AZERTAC-ის ცნობით, მიმართვაში ნათქვამია:

"ძვირფასო პრემიერმინისტრო,

ჩვენ მივიღეთ მისი უწმინდესობის ილია II-ის, ჩვენი დროის გამორჩეული რელიგიური მოღვაწის, სრულიად საქართველოს კათოლიკოს-პატრიარქის გარდაცვალების ამბავი.

მისმა უწმინდესობამ, ილია II-მ მთელი თავისი ცხოვრება და მოღვაწეობა კეთილშობილურ იდეალებს მიუძღვნა თავისი ხალხისა და კაცობრიობის საკეთილდღეოდ. კავკასიაში მშვიდობისა და სიმშვიდის, ადამიანური სოლიდარობის, რელიგიათაშორისი გაგებისა და დიალოგის დამყარებისკენ მიმართული საქმიანობით, მისმა უწმინდესობამ ილია II-მ მილიონობით ადამიანის გული მოიგო, მიუხედავად მათი ეროვნებისა და რელიგიური კუთვნილებისა, და ღრმა პატივისცემა და თანაგრძნობა დაიმსახურა.

მისმა უწმინდესობამ ილია II-მ დიდი წვლილი შეიტანა აზერბაიჯანსა და საქართველოს შორის ტრადიციული მეგობრობისა და თანამშრომლობის ურთიერთობების განვითარებასა და განმტკიცებაში.

ამ მძიმე დანაკარგის გამო მწუხარების გაზიარებით, ჩემი და აზერბაიჯანელი ხალხის სახელით გამოვხატავ უღრმეს მადლიერებას. "სამძიმარს თქვენ, მთელ საქართველოს და საქართველოს მართლმადიდებელ ეკლესიას", — წერს ილჰამ ალიევი ირაკლი კობახიძეს.

შეგახსენებთ, მიმდინარე წლის 17 მარტს, 93 წლის ასაკში სრულიად საქართველოს კათოლიკოს-პატრიარქი ილია II გარდაიცვალა. 17 მარტის დილას, ილია II-ის ჯანმრთელობის მდგომარეობა გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს და ჯანმრთელობის კრიტიკული მდგომარეობის გამო მართვით სუნთქვაზე იმყოფებოდა.

სრულიად საქართველოს კათოლიკოს-პატრიარქის, ილია II-ის გარდაცვალების გამო საქართველოში გლოვა გამოცხადდა.