ნარკოლოგი და პარტია ფედერალისტების წევრი ზურაბ სიხარულიძე 8 მარტს აქტივისტისა და საერთაშორისო ურთიერთობების სპეციალისტის, დავით ჩხეიძისთვის ნარკოტესტის გაკეთების მოთხოვნით განყოფილებაში გადაყვანას ეხმაურება. მისი თქმით, პოლიციის მხრიდან ნარკოლოგიური შემოწმების ჩატარების პროცესში რამდენიმე დარღვევა დაფიქსირდა.

"რამდენი დარღვევა დაფიქსირდა მათივე კანონებით — კატასტროფა! და ვინმე იტყვის, რომ ეს არ არის პოლიტიკური დევნა?!

1. ნერწყვის ტესტის გაკეთებისას პირს უნდა აუხსნან და აჩვენონ, კონკრეტულად რომელ ნარკოტიკულ ნივთიერებაზე ტარდება შემოწმება.

2. ტესტი არის სწრაფი და შემოწმება უნდა მოხდეს ადგილზე, ადამიანის თვალწინ. პასუხი მიიღება დაახლოებით 5 წუთში; ნიმუში არსად არ უნდა წაიღონ — შედეგი იქვე, მის თვალწინ უნდა აჩვენონ.

3. თუ ადამიანი უარს აცხადებს პატრულთან ერთად წასვლაზე, მას აქვს 4 საათი, რომ თავად მიმართოს ნარკოლოგიურ ექსპერტიზას და გაიკეთოს ალტერნატიული ანალიზი.

4. ნერწყვის ტესტი საკმაოდ ხშირად იძლევა ცრუ დადებით პასუხს, განსაკუთრებით ამფეტამინზე, ამიტომ აუცილებელია შედეგის გადამოწმება — შარდის ანალიზით ან ქრომატოგრაფიული კვლევით.

აი, ეს ყველაფერი იყო დარღვეული", — წერს ზურაბ სიხარულიძე.

შეგახსენებთ, რომ უწყვეტი პროტესტის მონაწილე და საერთაშორისო ურთიერთობების სპეციალისტი დავით ჩხეიძე, გუშინ, 8 მარტს თაბუკაშვილის პოლიციის განყოფილებაში ნარკოტესტირების საბაბით გადაიყვანეს, რაც საბოლოოდ არ დადასტურდა.