აშშ-ის სახდეპი ისლამური რესპუბლიკის მიერ რეგიონის მასშტაბით განხორციელებული ბოლო სარაკეტო და დრონებით თავდასხმებთან დაკავშირებით, ამერიკის შეერთებული შტატების, ბაჰრეინის, იორდანიის, ქუვეითის, კატარის, საუდის არაბეთის სამეფოსა და არაბთა გაერთიანებული საემიროების მთავრობების საერთო განცხადებას ავრცელებს.

მათ მიერ გავრცელებულ ინფორმაციაში წერია, რომ აღნიშნული ქვეყნები მკაცრად გმობენ ირანის ისლამური რესპუბლიკის მიერ განხორციელებულ გაუაზრებელ თავდასხმებს. განცხადებაში ასევე ხაზგასმულია, რომ ისლამური რესპუბლიკის ქმედებები წარმოადგენს სახიფათო ესკალაციას, რომელიც მრავალი სახელმწიფოს სუვერენიტეტს არღვევს და საფრთხეს უქმნის რეგიონულ სტაბილურობას.

"ამერიკის შეერთებული შტატები, ბაჰრეინი, იორდანია, ქუვეითი, კატარი, საუდის არაბეთის სამეფო და არაბთა გაერთიანებული საემიროები მკაცრად გმობენ ირანის ისლამური რესპუბლიკის მიერ, რაკეტებითა და დრონებით რეგიონის სუვერენულ ტერიტორიებზე განხორციელებულ განურჩეველ და გაუაზრებელ თავდასხმებს, მათ შორის ბაჰრეინზე, ერაყზე, იორდანიაზე, ქუვეითზე, ომანზე, კატარზე, საუდის არაბეთის სამეფოსა და არაბთა გაერთიანებულ საემიროებზე. ეს გაუმართლებელი დარტყმები მიმართული იყო სუვერენული ტერიტორიების წინააღმდეგ, საფრთხეს უქმნიდა მშვიდობიან მოსახლეობას და დააზიანა სამოქალაქო ინფრასტრუქტურა.

ისლამური რესპუბლიკის ქმედებები წარმოადგენს სახიფათო ესკალაციას, რომელიც არღვევს მრავალი სახელმწიფოს სუვერენიტეტს და საფრთხეს უქმნის რეგიონულ სტაბილურობას. მშვიდობიანი მოსახლეობისა და იმ ქვეყნების მიზანში ამოღება, რომლებიც არ მონაწილეობენ საომარ მოქმედებებში, არის გაუაზრებელი და დესტაბილიზაციისკენ მიმართული ქცევა.

ჩვენ ერთიანნი ვართ ჩვენი მოქალაქეების, სუვერენიტეტისა და ტერიტორიის დასაცავად და კიდევ ერთხელ ვადასტურებთ ჩვენს უფლებას თავდაცვაზე ამ თავდასხმების წინაშე. ჩვენ კვლავ ერთგულნი ვრჩებით რეგიონული უსაფრთხოების მიმართ და მივესალმებით საჰაერო და სარაკეტო თავდაცვის სფეროში ეფექტურ თანამშრომლობას, რომელმაც თავიდან აგვაცილა გაცილებით დიდი მსხვერპლი და ნგრევა", — წერია საერთო განცხადებაში.

შეგახსენებთ, 28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა. დონალდ ტრამპმა ისლამური რესპუბლიკის ბირთვული პროგრამის განადგურების განზრახვის შესახებ გამოაცხადა. თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.