აზერბაიჯანის პრეზიდენტმა ილჰამ ალიევმა თავის ირანელ კოლეგას, მასუდ ფეზეშქიანს, ირანის უზენაესი ლიდერის, ალი ხამენეის გარდაცვალების გამო სამძიმარი გამოუცხადა. ინფორმაციას აზერბაიჯანული მედია ავრცელებს.

"ჩვენ ღრმად დაგვამწუხრა ცნობამ ირანის ისლამური რესპუბლიკის უზენაესი ლიდერის, აიათოლა სეიდ ალი ხამენეის ტრაგიკული გარდაცვალების შესახებ", — ნათქვამია აზერბაიჯანის პრეზიდენტის პრესსამსახურის მიერ გამოქვეყნებულ შეტყობინებაში.

ალიევმა ასევე აღნიშნა, რომ მისი გარდაცვალება დიდი დანაკლისია ირანისთვის

"აიათოლა სეიდ ალი ხამენეი მრავალი წლის განმავლობაში მნიშვნელოვან როლს ასრულებდა ირანის სახელმწიფოსა და საზოგადოების ცხოვრებაში და იყო ფიგურა, რომელსაც განსაკუთრებული ადგილი ეკავა თავისი ქვეყნის პოლიტიკურ და რელიგიურ ცხოვრებაში. მისი გარდაცვალება დიდი დანაკლისია ირანისთვის", — განაცხადა ალიევმა და ამ რთულ დროს ირანელ ხალხს მშვიდობა, სტაბილურობა და უსაფრთხოება უსურვა.

შეგახსენებთ, 28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა. დონალდ ტრამპმა ისლამური რესპუბლიკის ბირთვული პროგრამის განადგურების განზრახვის შესახებ გამოაცხადა. თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.