Wizz Air ირანში განვითარებულ მოვლენებთან დაკავშირებით განცხადებას ავრცელებს, სადაც აღნიშნულია, რომ ავიაკომპანია, 7 მარტის ჩათვლით, ყველა ფრენას აჩერებს ისრაელის, დუბაის, აბუ-დაბის, ამანისა და საუდის არაბეთის მიმართულებით.

კომპანია წერს, რომ ყურადღებით აკვირდებიან მოვლენების განვითარებას და მუშაობენ საავიაციო უწყებებთან, სამთავრობო სააგენტოებთან და აეროპორტის პარტნიორებთან ერთად, რათა ოპერაციები რაც შეიძლება მალე განახლდეს. მათივე თქმით, დაზარალებული მგზავრების მხარდასაჭერად, ყველა შესაძლო ვარიანტს განიხილავენ.

"ჩვენი გუნდები ყურადღებით აკვირდებიან მოვლენების განვითარებას და მუშაობენ საავიაციო უწყებებთან, სამთავრობო სააგენტოებთან და აეროპორტის პარტნიორებთან ერთად, რათა ოპერაციები რაც შეიძლება მალე განახლდეს და როგორც კი პირობები ამის საშუალებას მოგვცემს, შეფერხებული მგზავრები დანიშნულების ადგილებზე გადავიყვანოთ.

ამჟამად, საჰაერო სივრცის შეზღუდვები და უსაფრთხოების ზომები, რაც ჩვენს კონტროლს მიღმაა, გავლენას ახდენს დაგეგმილ რეისებზე. ჩვენ განვიხილავთ ყველა შესაძლო ვარიანტს დაზარალებული მგზავრების მხარდასაჭერად.

გთხოვთ, დარწმუნდეთ, რომ თქვენს ჯავშანში მითითებული საკონტაქტო მონაცემები განახლებულია და თვალი ადევნეთ თქვენს ელექტრონულ ფოსტას სიახლეების მისაღებად.

ჩვენ გულწრფელად ვაფასებთ თქვენს მოთმინებასა და გაგებას ამ პერიოდში", — წერია ავიაკომპანიის განცხადებაში.

შეგახსენებთ, 28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა. დონალდ ტრამპმა ისლამური რესპუბლიკის ბირთვული პროგრამის განადგურების განზრახვის შესახებ გამოაცხადა. თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.