შინაგან საქმეთა სამინისტროს ინფორმაციით, კასპის რაიონის სოფელ ოკამში სხეულის განზრახ ნაკლებად მძიმე დაზიანების, ცეცხლსასროლი იარაღის უკანონო შეძენა-შენახვა-ტარებისა და პოლიციელების მიმართ განხორციელებული წინააღმდეგობის ბრალდებით 1983 წელს დაბადებული გ.შ დააკავეს.

უწყების ინფორმაციით, პირმა ყოფით ნიადაგზე დაწყებული კონფლიქტის შედეგად,
ცეცხლსასროლი იარაღიდან გასროლით ფეხის არეში დაზიანება მიაყენა 1983 წელს
დაბადებულ მ.შ-ს. დაჭრილი კაცი კლინიკაში გადაიყავნეს, სადაც მას სამედიცინო დახმარება გაუწიეს.

ბრალდებულმა შემთხვევის ადგილზე მისულ სამართალდამცავებს ცეცხლი გაუხნა. ტვ პირველის ინფორმაციით, გ.შ თავდაცვის სამინისტროს ყოფილი თანამშრომელია.

"გ.შ-ს საცხოვრებელ სახლთან, მისი დაკავების მიზნით მისულ სამართალდამცველებს ბრალდებულმა პირმა ცეცხლი გაუხსნა, რის გამოც ადგილზე საჭირო გახდა განსაკუთრებულ დავალებათა დეპარტამენტის წარმომადგენლების მობილიზება.

შიდა ქართლის პოლიციისა და განსაკუთრებულ დავალებათა დეპარტამენტის წარმომადგენლების მიერ წარმატებით ჩატარებული ერთობლივი ღონისძიების შედეგად გ.შ. შემთხვევის ადგილზე ბრალდებულის სახით იქნა დაკავებული," — წერს უწყება.

მომხდარზე გამოძიება სისხლის სამართლის კოდექსის 118-ე და 236-ე და 353-ე მუხლებით მიმდინარეობს, რაც 8 წლამდე ვადით თავისუფლების აღკვეთას ითვალისწინებს.