ტანკერ Marinera-ს (ყოფილი Bella 1) ქართველ კაპიტანს, ავთანდილ კალანდაძეს ამერიკის შეერთებულ შტატებში ბრალი ოფიციალურად წარუდგინეს. ინფორმაციას The New York Times ავრცელებს.

როგორც The New York Times წერს, ბრალდების დოკუმენტი სასამართლოში გასულ კვირას, 12 თებერვალს, შეიტანეს, თუმცა თეთრმა სახლმა და აშშ-ის იუსტიციის დეპარტამენტმა ამ საკითხზე კომენტარი არ გააკეთეს. ავთანდილ კალანდაძეს ორი ბრალდება აქვს. ერთ-ერთი ფედერალური ბრალდება ყალბი დროშის გამოყენებას (კერძოდ, გაიანას დროშის) ეხება. მეორე ბრალდება აშშ-ის სანაპირო დაცვის ბრძანებების დაუმორჩილებლობას უკავშირდება — გემმა სვლა არ შეაჩერა და ამერიკული ძალები გემზე შემოწმებისთვის არ დაუშვა.

სანაპირო დაცვა ტანკერს პირველად მაშინ წააწყდა, როდესაც იგი ვენესუელისკენ ნედლი ნავთობის ჩასატვირთად მიემართებოდა. გემი ყალბი დროშით მოძრაობდა და მანამდე, ირანული ნავთობით ვაჭრობაში მონაწილეობის გამო აშშ-ის მიერ უკვე იყო სანქცირებული. იმ დროს აშშ აცხადებდა, რომ გემი პანამაში იყო რეგისტრირებული, თუმცა AMP-ის ცნობით, ის პანამის რეესტრიდან 2024 წლის ოქტომბერში ამოიღეს. Equasis-ის მონაცემებით, გემი შემდეგ გაიანას დროშის ქვეშ გადავიდა და ასე რჩებოდა. მოგვიანებით ის რუსეთის დროშის გამოყენება დაიწყო, თუმცა გემი არცერთ პორტში არ შესულა, რომ დროშის შეცვლა ოფიციალურად დაფიქსირებულიყო.

შეგახსენებთ, აშშ-მა 7 იანვარს ტანკერის დაყადაღების ბრძანება შეასრულა და გემი შოტლანდიაში გადაიყვანა, სადაც, როგორც იუწყებოდნენ, საწვავით უნდა შევსებულიყო. თუმცა აშშ-მა ეკიპაჟი გემიდან ჩამოიყვანა და ბოლო მომენტში კაპიტნის მეუღლემ შოტლანდიურ სასამართლოში სარჩელი შეიტანა, რათა მისი შოტლანდიიდან გაყვანა შეეჩერებინა. სანამ საქმე სასამართლოში განიხილებოდა, მედიამ გაავრცელა ინფორმაცია, რომ აშშ-მა იგი ქვეყნიდან ფარულად გაიყვანა და სანაპირო დაცვის ხომალდ Munro-ზე გადაიყვანა.