მოკლული 22 წლის ნიკო კვარაცხელიას დედა იზო ომაძე პროკურატურის მიერ გიგა ავალიანის საქმეზე დაკავებულებისთვის ბრალდების დამძიმებას ეხმაურება. ის სოციალურ ქსელში წერს, რომ მისი შვილის მკვლელობის საქმე პროკურატურამ დიდი ხნის წინ გახსნა, მაგრამ დამნაშავეს "ქართული ოცნების მაღალჩინოსნები მფარველობენ".

"მეგობრებო ძალიან მძიმე დღეა ყველასთვის, ისეთი სასტიკი კადრები ვიხილეთ. ქალბატონი ეკას მდგომარეობას კი ხედავთ, ღმერთს ვთხოვ მის ჯანმრთელობას.

ბოლომდე უნდა მივიდეს საქმე, მადლობა მას ასეთი თავგანწირული ბრძოლისთვის.
მე ყველას ვერ გპასუხობთ, არც ჩემი მდგომარეობაა ჯანსაღი, ერთს გეტყვით რომ არა ქართული ოცნების მაღალჩინოსნების მფარველობა, ნიკო კვარაცხელიას დახვრეტის საქმე დიდი ხანია გახსნილია!

მე ჭორაობის დონეზე არ დავიყვან ნიკოს საქმეს!

მოყვეს პროკურატურა! ყველა ფაქტი ჰქონდათ მაშინვე!

ცოტა ხნის წინ ამაოდ გამიჩნდა იმედი, რომელიც მალევე გამიქარწყლდა!" — წერს მოკლული ნიკო კვარაცხელიას დედა იზო ომაძე.

10 თებერვალს, პროკურატურის ბრიფინგზე ცნობილი გახდა, რომ გიგა ავალიანის მკვლელობისთვის 3 არასრულწლოვან ბრალდებულს ბრალდება დაუმძიმდა. ბრიფინგზე ასევე ცნობილი გახდა, რომ 3 ბრალდებულს ჯგუფური დანაშაული წარსულშიც ჩაუდენიათ — უწყება მათ ჯგუფური თავდასხმის 4 ეპიზოდზე ედავება.

2021 წლის 15 სექტემბერს, 22 წლის ნიკო კვარაცხელია საკუთარ საცხოვრებელ სახლთან მოკლეს. თავდამსხმელმა ნიკო კვარაცხელიას ცეცხლსასროლი იარაღით მრავალჯერ ესროლა და შემდეგ ადგილიდან მიიმალა. გამოძიების ვერსიით, 22 წლის ახალგაზრდას მკვლელობაში ბრალდებულები აკო ჭელიძე და გიორგი კავილაძე არიან — მათ სასამართლომ 17 და 16 წლით პატიმრობა მიუსაჯა. კვარაცხელიას ოჯახს დღემდე არ სჯერა გამოძიების ამ ვერსიის და ამტკიცებს, რომ კვარაცხელიას მკვლელობის შემკვეთ პირს სახელმწიფო მფარველობს.