"ამ ქვეყანაში სამართალი ქუჩაში დადის, ამიტომ გამოვდივარ ქუჩაში! ღმერთს ვთხოვ, რომ შემახვედროს მეც სამართალი! ", — ამის შესახებ მოკლული ნიკო კვარაცხელიას დედა, იზა ომაძე სოციალურ ქსელში წერს.

"პირველ რიგში, ბოდიშს გიხდით მეგობრებო! ცოტახანს უნდა გაგვიძლოთ შვილმოკლულ მშობლებს!

შვილის გარდაცვალება მშობლისთვის ხომ გაუსაძლისი ტკივილია, მაგრამ შვილმოკლული მშობლის მდგომარეობა, რომელმაც სამართალი ვერ იპოვა იცით როგორია?

მიწაში რომ უნდა ჩადონ შენი შვილი, მაშინ ძვლებში იმტვრევი და გულის ცემა ცას სწვდება, აი, ამ მდგომარეობაში ვართ მეხუთე წელია ყოველი დღე, თანაც ისე, რომ არც არავინ შეგვიწუხებია ჩვენი ტკივილით, ვეღარ ვუძლებ ვერა!

"ყოველივეს თავის დრო აქვს და ყველაფერს თავისი ჟამი ამ ცისქვეშეთში!
ჟამი ქვათა მიმოფანტვისა და ჟამი მათი შეგროვებისა! ჟამი დარღვევისა და ჟამი შეკერვისა, ჟამი დუმილისა და ჟამი უბნობისა" — ეკლესიასტე.

ბევრს ვთხოვდი ღმერთს, რომ ჟამი ქუჩაში გამოსვლისა არ დამდგომოდა, მაგრამ დამიდგა, კი ბატონო, ვიღებ გამოწვევას!

მეგობრებო, რამდენიმე დღე მაქვს ძალიან მნიშვნელოვანი და თარიღს ამიტომ ვერ ვწერ!
ამ ქვეყანაში სამართალი ქუჩაში დადის, ამიტომ გამოვდივარ ქუჩაში! ღმერთს ვთხოვ, რომ შემახვედროს მეც სამართალი!" — წერს მოკლული ნიკო კვარაცხელიას დედა, იზა ომაძე სოციალურ ქსელში.

2021 წლის 15 სექტემბერს, 22 წლის ნიკო კვარაცხელია საკუთარ საცხოვრებელ სახლთან მოკლეს. თავდამსხმელმა ნიკო კვარაცხელიას ცეცხლსასროლი იარაღით მრავალჯერ ესროლა და შემდეგ ადგილიდან მიიმალა. გამოძიების ვერსიით, 22 წლის ახალგაზრდას მკვლელობაში ბრალდებული აკო ჭელიძე და გიორგი კავილაძეა — მათ სასამართლომ 17 და 16 წლით პატიმრობა მიუსაჯა. კვარაცხელიას ოჯახს დღემდე არ სჯერა გამოძიების ამ ვერსიის და ამტკიცებენ, რომ კვარაცხელიას მკვლელობის შემკვეთ პირს სახელმწიფო მფარველობს.