როგორია თქვენი იდეალური საღამო? აი, ზოგიერთი ჩვენგანისთვის დღის საუკეთესო დასასრული მხართეძოზე წამოწოლა, სერიალის ყურება და პარალელურად, განსხვავებული კერძების დაგემოვნებაა.

ჩვენდა გასაკვირად, ამ, ერთი შეხედვით, უწყინარმა ჩვევამ შეიძლება უარყოფითად იმოქმედოს ჩვენს ორგანიზმზე.

"ზოგჯერ ტელევიზორის წინ წახემსება ნორმალურია, მაგრამ როდესაც ის მეორდება ან როდესაც ჭამა და ტელევიზორის ყურება ერთმანეთთან ასოცირდება, უკვე არაჯანსაღია", — განმარტავს ფსიქოლოგი სუზან ალბერსი.

ჭამა + ტელევიზორის ყურება = გაფანტულად კვება

თუ საკვებს ტელევიზორის (კომპიუტერის ან სმარტფონის) წინ მიირთმევთ, დიდი შანსია, რომ ეკრანზე მიმდინარე მოვლენებს უფრო მეტად აქცევდეთ ყურადღებას, ვიდრე იმ სპაგეტის, რომელსაც ჭამთ.

ფოტო: Freepik

მედიცინის ეროვნული ბიბლიოთეკის კვლევის მიხედვით, როდესაც ყურადღება გაფანტული გვაქვს იმაზე მეტს მივირთმევთ, ვიდრე გვგონია.

"ვფიქრობ, ტელევიზორის ყურებისას ჭამა ასევე ახანგრძლივებს იმ დროს, რომლის განმავლობაშიც ვიკვებებით", — ამბობს ექიმი ალბერსი — "მაგალითად, თუ თქვენი საყვარელი გადაცემის ხანგრძლივობა ერთი საათია, შესაძლოა, თქვენც ზუსტად იმდენ ხანსვე გააგრძელოთ ჭამა".

და როგორ მოვიშოროთ ეს ჩვევა?

თუ გადაწყვეტთ, გონივრულად იკვებოთ, რამდენიმე მარტივ რჩევას გთავაზობთ.

  • ერთმანეთისგან გააცალკევეთ ეს ორი მოქმედება

"ტელევიზორის ყურებისას წახემსება ნორმალურია, მაგრამ აუცილებლად აიღეთ მისგან პაუზა და წასახემსებლად მაგიდასთან გადადით, შემდეგ ისევ ტელევიზორს დაუბრუნდით", — გვირჩევს ექიმი ალბერსი.

ფოტო: Freepik

კვლევები გვიჩვენებს, რომ საკვებზე სათანადო ყურადღების მიქცევამ შეიძლება შეამციროს როგორც საკვების მიღების რაოდენობა, ისე შიმშილის გრძნობა და წახემსების სურვილი.

  • სწორად შეარჩიეთ საკვები

თუ საღამოს რამის მირთმევა გსურთ, აირჩიეთ ისეთი საკვები, რომელიც არ იქნება შაქრიანი ან კოფეინის შემცვლელი.

ფოტო: Freepik

ისეთი ნახშირწყლები, როგორებიცაა: ბურღულეული ან კრეკერი, შეიძლება ძილის გაუმჯობესებაშიც კი დაგეხმაროთ.

  • დააწესეთ დროის ლიმიტი

უმჯობესი იქნება, თქვენ თავს დროის ლიმიტი დაუნიშნოთ როგორც წახემსების, ისე ტელევიზორის ყურებისას. ეცადეთ, მხოლოდ ერთი ჯამი პოპკორნი მიირთვათ (ნაცვლად მთელი შეფუთვისა) და თქვენი საყვარელი სერიალის მხოლოდ ორ ეპიზოდს უყუროთ (მთლიანი სეზონის ნაცვლად).

ფოტო: Freepik

ექიმი ალბერსის თქმით, ძილის ერთი ან ორი საათით შემცირებამ შეიძლება მეორე დღეს მადის ჰორმონებზე იმოქმედოს და შაქრიანი ან მარილიანი საკვების მიმართ მოთხოვნილება გამოიწვიოს.

გაითვალისწინეთ, რომ საკვების დიდი რაოდენობით მიღების სურვილს სხვა უამრავი ფაქტორიც შეიძლება უწყობდეს ხელს, მაგალითად — უძილობა, სტრესი და ა.შ. ამიტომ თუ ტელევიზორის წინ ჭამას ვერ წყვეტთ, დაფიქრდით, შეიძლება თუ არა ამაზე სხვა ფაქტორებიც მოქმედებდეს.