გიგა ავალიანის მკვლელობისთვის ბრალდებულის, დ.ჩ.-ს დედა სოფო ძნელაძე პროკურატურის მიერ გავრცელებულ კადრებზე აცხადებს, რომ "აბსურდია", მისი შვილი მხოლოდ ერთ ცემის ეპიზოდში ამოიცნო.

შემდეგ არასრულწლოვანი ბრალდებულის დედამ დასძინა, რომ ეს "საყოფაცხოვრებო" ჩხუბი იყო და პროკურატურამ მის ოჯახზე "შური იძია".

"ამ კადრებში, რაც პროკურატურამ დრეს გვაჩვენა, ერთადერთ ვიდეოში, სკვერში ჩხუბის ვიდეოში არის ჩემი შვილი, ღია სკვერში, სადაც არის ჩხუბი. დანარჩენ ჩხუბში, სადაც წერია, ერთი ეპიზოდია თუ არ ვცდები, სადაც დემეტრე ჩიქოვანი წერია, დემეტრე იმ ჩხუბში არ არის, ეს არის აბსურდი, ეს არის ბუნებაში რომ არ არსებობს ისეთი ბრალდება. დემეტრე ჩიქოვანის ტელეფონიდან არავითარი ვიდეო არ არის ამოღებული. ეს არის შურისძიება კონკრეტულად პროკურატურის მხრიდან ჩემს ოჯახზე.

იმ სკვერში [რომელიც ჩანს პროკურატურის მიერ გავრცელებულ კადრებში] იყო ჩვეულებრივი საყოფაცხოვრებო ჩხუბი, არ ვიცი რასთან დაკავშირებით მოხდა ჩხუბი, მაგრამ რაც დავინახე სკვერში გოგოები, ბიჭები და უამრავი ხალხი, სახე დაფარული ჰქონდა მე რაც დავინახე, მაგრამ ჩემი შვილია და ვიცანი," — თქვა გიგა ავალიანის მკვლელობისთვის ბრალდებული დ.ჩ.-ს დედამ, სოფო ძნელაძემ ტვ პირველთან საუბრისას.

შეგახსენებთ, პროკურატურის ბრიფინგზე ცნობილი გახდა, რომ გიგა ავალიანის მკვლელობაში ბრალდებულ არასრულწლოვანებს, ა.გ.-ს, გ.რ-სა და დ.ჩ.-ს ბრალი სხვა საქმეზეც წარედგინათ.

უწყების ინფორმაციით, მათ ჯგუფურ ძალადობის 5 ეპიზოდზე ედებათ ბრალი და ბრიფინგზე უწყებამ თავდასხმის ამსახველი ვიდეოკადრებიც წარადგინა.

ხუთივე ეპიზოდში გ.რ. მონაწილეობდა, ოთხ ეპიზოდში — დ.ჩ., ხოლო ა.გ. მხოლოდ ორ ეპიზოდში. პროკურატურამ ბრიფინგზე ძალადობის ამსახველი კადრები აჩვენა, რომელსაც თვითონ ბრალდებულები იღებდნენ. ბრალის დამძიმების შემდეგ მათ 9-დან 14 წლამდე პატიმრობა ემუქრებათ.